“Nëse s’dorëzojnë kërkesë brenda afatit, do ndëshkohen”
Janë me dhjetëra qytetarë që s’kanë marrë bonusin prej 40 mijë lekësh të akorduar nga qeveria. Kryeministri Rama ka paralajmëruar dje bizneset se kanë afat deri në 5 qershor për të dorëzuar kërkesë në Drejtorinë e Tatimeve, në të kundërt do të përballen me penalitete. “Administrata Tatimore ka kryer të gjitha verifikimet për dhjetëra mijëra punonjës, më shumë sesa 109 mijë e 664 punonjësit e shpërblyer deri tani me paketën e zgjeruar, të cilëve u takon mbështetja e qeverisë shqiptare prej 40.000 lekësh. Ata ende nuk e marrin dot këtë shpërblim, sepse ju nuk keni kryer detyrimin tuaj ligjor e moral për ta, duke mos aplikuar në faqen zyrtare të Tatimeve për shpërblimin e tyre. Kjo është e turpshme, përveçse e dënueshme me ligjin në fuqi. Keni 1 javë kohë, deri në 5 qershor, të plotësoni online formularin me të dhënat e individëve përfitues në sipërmarrjet tuaja, në të kundërt penalizimi për mosaplikim për cenimin e hapur të së drejtës së punonjësve tuaj, do të jetë i pashmangshëm”, ka shkruar Rama, i cili ka bërë të qartë po ashtu, se në rast se tatimpaguesi nuk do të aplikojë brenda datës 5 qershor, pagesa për ndihmën financiare do të kryhet menjëherë në llogarinë e punonjësve në mënyrë automatike dhe punëdhënësi përkatës do të ndëshkohet. Ndërkohë, sipas ministrit për Rindërtimin, Arben Ahmetaj, Shqipëria ka ndjekur një qasje ku ka mbështetur të papunët dhe ka dy paketa të rëndësishme që injektojnë ndihmë financiare drejtpërsëdrejti te qytetarët. Në një intervistë dhënë për “News 24”, Ahmetaj tha se janë 179 mijë qytetarë që përfitojnë nga paketa e dytë. “Të gjitha ankesat e qytetarëve u analizuan me kujdes dhe qeveria vendosi zgjerimin e fashës kohore dhe kemi edhe evidentimin e dytë. Tani nuk kemi më nevojë për aplikimin e administratorëve, por ia kalojmë në mënyrë të drejtpërdrejtë ndihmën në bazë të dhënave në Drejtorinë e Tatimeve dhe nga kjo fitojnë 50 mijë qytetarë. 179 mijë perona përfitojnë me paketën e dytë. Qeveria u dha pagë të gjithë qytetarëve që humbën punën për shkak të pandemisë, duke zgjeruar fashën kohore dhe duke mos pritur që administratorët të aplikojnë për ta apo vetë qytetarët. Nëpërmjet të dhënave që ka Drejtoria e Tatimeve, do të shkojë 40 mijë lekëshi në llogarinë e secilit”, tha Ahmetaj.