Kuvendi miraton shtyrjen e pagesës së tatimit mbi fitimin
Denaj: Bizneset deri në 14 milionë lekë nuk do ta paguajnë
Me 84 vota pro, 16 kundër dhe 5 abstenim, Kuvendi ka miratuar dje aktin normativ për ndryshimin e ligjit për tatimin mbi të ardhurat për shtyrjen e pagesës së kësteve të tatimit mbi fitimin për një kategori biznesesh, aktiviteti i të cilëve është dëmtuar nga masat e ndërmarra për COVID- 19. Sipas Ministres së Financave Anila Denaj, për bizneset e vogla, këstet e tatimit mbi fitimin për këtë vit do të amnistohen. Ndërsa për bizneset e mëdha, do të zhvendosen vitin tjetër. “Për bizneset me qarkullim deri në 14 milionë lekë, këstet e tatimit mbi fitimin për vitin 2020 nuk do të paguhen. Për bizneset me qarkullim mbi 14 milionë lekë, këstet e tatimit mbi fitimin për tremujorin e dytë dhe të tretë do të shtyhen për të njëjtën periudhë të vitit të ardhshëm. Këstet e tatimit mbi fitimin për periudhën prill- dhjetor 2020, që ushtrojnë veprimtari në fushën e turizmit, fasonerisë dhe Call Center nuk do të paguajnë për 2020, por për të njëjtën periudhë në vitin 2021”, u shpreh Denaj. Nga këto shtyrje janë përjashtuar bankat, kompanitë e telekomunikacionit, farmacitë dhe bizneset ushqimore, aktiviteti i të cilëve ka vijuar normalisht edhe gjatë kohës së pandemisë. Dje ka kaluar për miratim edhe akti normativ për ndryshimin e ligjit për taksat vendore, ku përjashtohen nga pagimi i taksës së ndikimit në infrastrukturë, kompanitë që do të merren me rindërtimin pas dëmit të shkaktuar nga tërmeti i 26 nëntorit. “Subjektet me xhiro nga 5 deri në 8 milionë lekë, për vitin 2020, nuk do të paguajnë, tatimin e thjeshtuar mbi fitimin. Përjashtohen nga pagesës e taksës së ndikimit në infrastrukturë, investimet në funksion të programeve të rindërtimit, sipas ligjit, me qëllim uljen e kostove për rehabilitimin e komuniteteve të prekura si pasojë e fatkeqësisë”, vuri në dukje Ministrja e Financave Anila Denaj.