Numëruesit dhe shenjat e gishtave ndajnë PS me PD, SHBA dhe BE: Mos zhgënjeni!
“Në qoftë se Kodi nuk miratohet me konsensus, regjistrojeni këtë: Zero çelje negociatash të Shqipërisë me Bashkimin Europian, as në 2025”
Presidenti Meta inkurajoi bashkëpunimin për Reformën Zgjedhore, duke kërkuar miratimin e saj me konsensus. Gjatë një bashkëbisedimi me gazetarët, kreu i shtetit tha dje se do të shpallë datën e zgjedhjeve të përgjithshme, menjëherë pas miratimit të Kodit të ri Zgjedhor, për të pasur një Parlament legjitim dhe zgjedhje të lira e të ndershme. Presidenti i Republikës kërkoi konsensus për Reformën Zgjedhore, sepse mungesa e tij do të bllokonte për një kohë të gjatë integrimin e vendit dhe përgjegjësia sipas tij, do të jetë e aktorëve politikë. Meta ishte i prerë se pas caktimit të datës së zgjedhjeve, nuk do të ketë më kthim prapa, në zgjedhje mund të hyjë çdo subjekt politik që duhet të përfaqësojë elektoratin opozitar. “Presidenti do t’i drejtohet të gjithë botës demokratike, organizatave ndërkombëtare, mediave të huaja, do të marrë masat e tij për monitorimin e zgjedhjeve të ardhshme dhe kushdo që do të hyjë për të marrë pjesë në zgjedhje, ka inkurajimin e Presidentit që të marrë pjesë në zgjedhje dhe të luftojë për të përfaqësuar të gjithë shqiptarët që janë në opozitë e që sot kanë ngelur në rrugë, sepse nuk përfaqësojnë asnjë institucion”, tha Meta.
TEATRI
Kam zhvilluar një bashkëbisedim nëpërmjet një video- konference me përfaqësuesit e “Europa Nostra”, të cilët i falënderova për angazhimin e tyre për promovimin dhe ruajtjen e trashëgimisë kulturore dhe historike të vendit tonë. U ra dakord për domosdoshmërinë e nisjes së një hetimi ndërkombëtar për çështjen e shembjes së paligjshme dhe arbitrare të Teatrit Kombëtar, çka tronditi të gjithë opinionin publik vendës dhe ndërkombëtar. Po kështu, u ra dakord për të vijuar bashkëpunimin edhe për shumë çështje të tjera në vendin tonë, që kanë të bëjnë me ruajtjen dhe mbrojtjen e trashëgimisë sonë kulturore, edhe si pjesë e trashëgimisë europiane të kulturës.
DIALOGU
Dua t’ju sqaroj se pas furtunës në gotë që u ngrit javën e kaluar, kam bërë disa prononcime publike për t’i bërë plotësisht të qartë dhe transparente opinionit publik, përpjekjet e mia të sinqerta për të ndërtuar konsensus mbi axhendën e integrimit europian të Shqipërisë. Brenda disa javësh do të propozohet edhe kuadri negociator për Shqipërinë nga Komisioni Europian. Për fat të keq, edhe kësaj here përpjekjet e mia që ky moment ta gjente vendin më të bashkuar, më të përgatitur dhe më të angazhuar në axhendën e reformave, u minua. Tashmë secili aktor le të marrë barrën e përgjegjësive të veta përballë qytetarëve dhe partnerëve europianë. Siç e bëra publike gjatë kësaj jave, unë do të kaloj tani më pak kohë me Tiranën politike dhe do t’i përkushtohem më shumë Shqipërisë së qytetarëve.
VASIL LAÇI
Mesazhet e mia kanë qenë tepër të qarta. Në kuadër të 75vjetorit të çlirimit të atdheut, unë kam përzgjedhur dy figura që i konsideroj të jashtëzakonshme në historinë e Shqipërisë për t’i vlerësuar përtej çdo aspekti ideologjik, sepse janë dy figura që i takojnë ideologjisë kombëtare dhe janë pjesë e pacenueshme e krenarisë kombëtare dhe gjithëshqiptare: Mujo Ulqinakun, Heroi i 7 Prillit, dhe Vasil Laçin, një tjetër figurë e jashtëzakonshme, i cili i dha mesazhet e tij shumë qartë dhe për shkak të atyre mesazheve që ka dhënë, qëndron në përjetësi. Aludimet e tjera janë një çështje e juaja. Unë si President jam në krye të detyrës dhe e kam bërë të qartë se uroj më të mirën për të gjitha zhvillimet në vend. Jo çdo gjë varet nga unë, por ajo që varet nga unë është e pakthyeshme. Ky institucion do të vazhdojë të jetë deri më 24 korrik 2022 kështjellë e mbrojtjes së Kushtetutës dhe sovranitetit të Republikës së Shqipërisë, për aq sa ka mundësi Presidenti i Republikës së Shqipërisë. Kjo është një çështje e padiskutueshme.
KODI ZGJEDHOR
Unë shpresoj shumë, jam shumë i entuziazmuar nga lajmet e fundit, nga të gjitha llojet e cicërimave që ka përparim për çështjen e Këshillit Politik. Mezi po pres që ta duartrokas këtë konsensus…
Dhe kudo që të jem në Shqipëri, do të kthehem menjëherë këtu që ta firmos konsensusin e tyre dhe të lajmërojmë të gjithë botën që kjo është një arritje shumë e madhe.
E zëmë se palët nuk ranë dakord, apo jo? Unë nuk e di se për cilën arsye, por nuk e dëshiroj kurrë këtë gjë. Unë do të shikoj nëse miratohet në mënyrë të njëanshme, është apo nuk është në përputhje me Kushtetutën, me ligjet, me rekomandimet. Mundësia ime është ta kthej një herë për reflektim, për çdo rast dhe kaq. Pastaj, se si veprojnë është në varësi të aktorëve të tjerë, nuk është në varësinë time.
Gjithsesi, në çdo rast dhe këtë mezi po e presim të gjithë, se edhe dy ditë kohë kanë ngelur, por edhe në mënyrë të njëanshme po të miratohej nuk do të habiteshim, sepse këtu ka gjithmonë zhvillime të paparashikueshme dhe të befasishme, përsëri si President i Republikës duhet ta bëj të qartë se në hapësirën kushtetuese dhe ligjore që edhe Kodi do të më lejojë, i miratuar me konsensus apo jo, në ditën më të parë të mundshme do të shpall ditën e ardhshme të zgjedhjeve të përgjithshme në Shqipëri dhe nuk do të bëj asnjë konsultim formal me asnjë forcë politike.
Sepse jam i sigurt se që të gjithë mezi presin një Parlament të ri, plotësisht legjitim, pra që do të thotë se të gjitha palët kanë vullnetin për zgjedhje të lira, të ndershme, që ato të mos jenë më një bllokim për integrimin europian të Shqipërisë.
Që ta kemi të qartë: Në qoftë se Kodi nuk miratohet me konsensus, regjistrojeni këtë: Zero çeljesh negociatash të Shqipërisë me Bashkimin Europian! Jo deri në zgjedhjet që vijnë, por edhe pas zgjedhjeve që vijnë. Pra, sa i bie, nja pesë vite të paktën i keni të humbura. Përgjegjësia duhet të jetë e atyre aktorëve, të cilët i bëjnë këto gjëra. Apeli im është: Ecni në këtë rrugë të konsensusit, se kjo është gjë shumë e mirë për vendin dhe unë ju inkurajoj fuqimisht të gjithëve në këtë drejtim.
OSBE
Mos harroni se kemi edhe kryesimin e radhës së OSBE- së. Dhe do të ishte një turp i madh që Shqipëria, përveç këtyre ngjarjeve të fundit me Teatrin Kombëtar, të mos përmbushë rekomandimet e OSBE/ ODIHR- it. Do të ishte një rast i paprecedent në historinë e OSBE- së. Megjithatë, është zgjedhja e tyre, Presidenti është shumë i qartë. Firmoset dekreti, nuk kthehet më prapa, kush të dojë të hyjë në zgjedhje, kush të dojë të ikë nga zgjedhjet. Natyrisht që kjo nuk do të mjaftojë, se Presidenti do të bëjë punën e tij. Presidenti do t’i drejtohet të gjithë botës demokratike, organizatave ndërkombëtare, mediave të huaja, do të marrë masat e tij për monitorimin e zgjedhjeve të ardhshme dhe kushdo që do të hyjë për të marrë pjesë në zgjedhje, ka inkurajimin e Presidentit që të marrë pjesë në zgjedhje dhe të luftojë për të përfaqësuar të gjithë shqiptarët që janë në opozitë e që sot kanë ngelur në rrugë, sepse nuk përfaqësojnë asnjë institucion.
KEQINFORMIMET
Këto muhabete “rilindjeje” lërini për ndonjë vend tjetër! Jua thashë edhe një herë dhe po jua përsëris: Nuk merrem më me këto histori e me këto punë. Aq më tepër me thashetheme. Presidenti është në detyrën e tij si kryetar i shtetit. I bën detyrat e tij me përgjegjësi. Mbron Kushtetutën e Republikës së Shqipërisë. Mbi Presidentin është vetëm Kushtetuta dhe mbi Kushtetutën është vetëm populli. Gjithë vendet anëtare të Këshillit të Sigurisë në OKB, shto edhe fuqitë bërthamore që nuk janë anëtare të bashkohen, nuk e detyrojnë dot Presidentin e Republikës së Shqipërisë të shkelë Kushtetutën e vendit të tij.
Në ditën më të parë të mundshme do të shpall ditën e ardhshme të zgjedhjeve të përgjithshme në Shqipëri dhe nuk do të bëj asnjë konsultim formal me asnjë forcë politike
Gjithë vendet anëtare të Këshillit të Sigurisë në OKB, shto edhe fuqitë bërthamore që nuk janë anëtare të bashkohen, nuk e detyrojnë dot Presidentin të shkelë Kushtetutën