Dhuna ndaj 15- vjeçarit, kreu i Policisë përdor videon e nënës me pistoletë në film
"Fadromat nisën ta shembinn Teatrin kur kishte njerëz brenda”
Artistët i kërkuan dje SPAK- ut, arrestimin e ministrit të Brendshëm, drejtorit të Përgjithshëm të Policisë dhe kryetarit të Bashkisë së Tiranës, duke i akuzuar për "Vrasje të mbetur në tentativë" dhe "Shpërdorim detyre".
Ata depozituan një tjetër kallëzim penal në ngarkim të Sandër Lleshajt, Ardi Veliut dhe Erion Veliajt, në Prokurorinë e Posaçme kundër Krimit të Organizuar dhe Korrupsionit. Sipas Aleancës për Mbrojtjen e Teatrit, në momentin kur fadromat nisnin të shembnin Teatrin Kombëtar, brenda tij ndodheshin ende njerëz. Për pasojë, është rrezikuar seriozisht jeta e tyre dhe për këtë arsye artistët e konsiderojnë si vrasje në tentativë atë që ndodhi në orët e para të datës 17 maj. "Pamjet filmike tregojnë qartazi dhunën e ushtruar gjatë shoqërimit të protestuesve, por edhe se si një numër i madh i forcave të Policisë ishin prezentë aty me armë dhe pa numër identifikimi, i cili në bazë të ligjit për Policinë e Shtetit dhe akteve të tjera të dala në zbatim të tij, është detyrim dhe jo dëshirë e punonjësve të Policisë apo eprorëve të tyre", thuhet në kallëzimin e depozituar në SPAK. Ndërsa theksohet se ky fakt, që do e vërtetojnë me pamje filmike, e kanë konstatuar edhe te një numër i madh i forcave të Policisë Bashkiake të pranishëm në shembjen dhe në veprimet e dhunshme. "Gjatë këtij aksioni policor, bie në sy prania e një numri të konsiderueshëm të forcave RENEA ( mbi 50 policë), të cilët me veprime konkludente dhune i kanë drejtuar armë të tipit automatik artistëve të ndryshëm dhe po në mënyrë të dhunshme, i kanë nxjerrë jashtë dhe i kanë shoqëruar në komisariate të ndryshme", rendisin artistët në kallëzimin e tyre të depozituar në Prokurorinë e Posaçme.