Fluturimi me charter i Ramës përplas PD- në me qeverinë
Bardhi: Rama shpenzon 100 mijë euro për udhëtime personale
Fluturimi i Kryeministrit Edi Rama dje me charter nga Tirana për në Paris shkaktoi debat mes sekretarit të përgjithshëm të PD- së, Gazment Bardhi, dhe këshilltarit të Kryeministrit, Endri Fuga. Bardhi akuzoi dje Kryeministrin Rama se shpenzon 100 mijë euro për udhëtime personale me avion qeveritar. “Ndërkohë që vendi është mbërthyer nga kriza, Edi Rama zgjedh ta kalojë fundjavën në Paris. Duke shfrytëzuar avionin e ‘ Air Albania’ si charter personal, Kryeministri ka kaluar këtë fundjavë në Paris pa dhënë asnjë shpjegim apo njoftim zyrtar për arsyet e këtij udhëtimi. Për ç’arsye Edi Rama përdor avionin e shtetit shqiptar si plaçkë personale? Në këto ditë kaq të vështira për qytetarët, si mundet që një kryeministër të shpenzojë për luksin e tij 100.000 euro të shqiptarëve për charter personal?”, ngriti pikëpyetjet numri dy i PD- së. Përgjigjen, Bardhi e mori përmes këshilltarit të Kryeministrit Edi Rama, Endri Fuga. Ky i fundit sqaroi se avioni qeveritar përdoret vetëm për punë, ndërkohë që i konsideroi si të turpshme akuzat. “E turpshme akuza për udhëtimin 24- orësh të KM në Paris me avionin, që siç e kemi sqaruar publikisht, përdoret veç për arsye pune, bazuar në një marrëveshje të posaçme me ‘ AIR ALBANIA’, pa qëllim fitimi. Ata që akuzojnë, mesa duket vetëm këto që shpifin për ne kanë bërë kur qeverisnin”, shkroi Fuga. Mirëpo, selia blu nuk i konsideron turp akuzat e ngritura nga numri dy i saj, por mungesën e transparencës nga ana e kreut të qeverisë. “E turpshme është që Edi Rama të harxhojë me mijëra euro për luksin personal, kur shqiptarët i ka lënë në pikë të hallit. E turpshme është që Edi Rama të udhëtojë si hajdut me charter personal dhe ta mbajë të fshehtë arsyen. E turpshme është të justifikosh luksin dhe vjedhjen e Ramës”, reagoi PD- ja.