Spahia: Ministria po fsheh shifrën reale të të infektuarve

Ish- deputeti i Partisë Demokratike, Bardh Spahia, ka hedhur akuza në drejtim të ministres së Shëndetësisë, Ogerta Manastirliu, për fshehjen e shifrave reale të të infektuarëve me COVID- 19. Në një reagim pas rritjes së rasteve pozitive me koronavirus në ditët e fundit, Bardhi thotë se vetëm në Qendrën Shëndetësore Nr. 9, vatra e re e infeksionit Covid- 19, kanë rezultuar pozitivë 4 anëtarë të personelit, 2 mjekë, një infermiere dhe personi në recepsion. Duke cituar të dhënat e 24 orëve të fundit, ku rezultojnë të infektuar dy staf mjekësor, Spahia thekson se kjo është një gënjeshtër skandaloze dhe e paturpshme. “E pabesueshme se si mund të gënjehet kaq paturpësisht, duke fshehur shifrën reale të të infektuarve në personelin shëndetësor! Sot, Ministria e Shëndetësisë tha se nga 35 anëtarë të personelit shëndetësor të testuar, vetëm 2 kanë rezultuar pozitivë. Kjo është një gënjeshtër skandaloze dhe e paturpshme! Vetëm në Qendrën Shëndetësore Nr. 9, vatra e re e infeksionit Covid- 19, kanë rezultuar pozitivë 4 anëtarë të personelit, 2 mjekë, një infermiere dhe personi në recepsion. Dhe testet në këtë qendër u bënë vetëm pasi u denoncua se pas identifikimit të 2 të infektuarve të parë, personelit nuk u ishin bërë tamponët. Testet janë bërë dje, por vetëm disa anëtarëve të personelit që paraqisnin simptoma dhe disa familjarëve të tyre, jo të gjithë personelit të Qendrës. Nga testimet e pjesshme kanë rezultuar pozitivë 4 anëtarë të personelit mjekësor, ndërsa ministria raporton vetëm 2 në total”, shkroi Bardh Spahia.