Test te privati, “Intermedica”: Përballojmë 1000 analiza në ditë
Nga 123 të shtruar, 17 në gjendje të rëndë dhe një i intubuar
Situata pandemike në vendin tonë vijon të mbetet shqetësuese. Si kurba e rasteve të identifikuara, ashtu edhe nevoja për trajtim spitalor e të prekurve është në rritje.
Nga 110 të shtruar në dy spitalet COVID, numri i të infektuarve që duan shërbim ka arritur në 123. Prej tyre, 17 ndodhen në gjendje të rëndë dhe një i intubuar. Lajmi i vetëm i mirë janë fatalitetet. Pas disa ditësh me disa humbje jete, dje u regjistrua një viktimë. Bëhet fjalë për një 69- vjeçare nga Shkodra, e cila, pas disa ditësh në gjendje të rëndë, nuk e fitoi dot betejën me virusin. Numri i rasteve të zbuluara ditën e shkuar është më i ulët në raport me një ditë më parë, sikundër edhe numri i testeve të kryera. Nga 501 testime të shtunën, ditën e fundit të javës janë realizuar vetëm 331, nga të cilat janë konfirmuar pozitivë 82 raste. Shumica prej tyre janë në kryeqytet. “Shpërndarja gjeografike e rasteve është si vijon: 32 raste në Tiranë, nga 7 raste në Kavajë, Fier, 5 në Korçë, nga 4 raste Shkodër, Durrës, Elbasan, nga 3 raste në Krujë, Kurbin, nga 2 raste në Lezhë, Vlorë, Mirditë, Dibër dhe nga 1 rast në Has, Lushnje, Mallakastër, Kukës, Ura Vajgurore”, raportoi
Rovena Daja e Institutit të Shëndetit Publik. Sakaq, nisur nga shpërndarja gjeografike e rasteve të identifikuara derimë tani, vatrat më problematike janë Tirana, Durrësi, Shkodra e Vlora, ku gjenden mbi 70% e të infektuarve aktivë. Si në çdo komunikatë, Ministria e Shëndetësisë e mbyll me një lutje për të qenë vigjilentë dhe respektuar masat. “Ministria e Shëndetësisë u drejtohet të gjithë qytetarëve të konfirmuar pozitivë me Covid19, por që janë në kushte shtëpie, të respektojnë karantinimin e detyrueshëm, si dhe kushdo që është i dyshuar, duhet të qëndrojë i izoluar dhe të telefonojë 127 nëse ka shenja të sëmundjes”.