“Laktoferrina mund të jetë çelësi i trajtimit të COVID- 19”
Profesor Prifti: Laktoferrina gjendet me shumicë në kulloshtrën e nënës
Nuk ka ende një kurë të certifikuar për të mposhtur COVID- 19, por shkencëtarët në Itali kanë zbuluar së fundmi se laktoferrina, një proteinë kjo që gjendet në kulloshtrën e nënës, mund të jetë çelësi për trajtimin e kësaj sëmundjeje. Lajmi është ndarë nga shefi i Shërbimit të Kardiokirurgjisë në QSUT, Edvin Prifti. Përmes një statusi në rrjetet sociale, profesori ka prezantuar rezultatet e shkencëtarëve të dy universiteteve në Romë. “Universiteti i La Sapiencës dhe i Tor Vergates në Romë demonstrojnë një hap drejt trajtimit të COVID- 19. Shkencëtarët kanë zbuluar që laktoferrina mund të jetë çelësi i trajtimit të COVID- 19. Kjo është një proteinë, e cila merret nga nëna dhe shpjegon se pse fëmijët infektohen shumë më pak. Laktoferrina gjendet me shumicë në kulloshtrën e nënës. Përveç shumë efekteve mbrojtëse që ka, ajo shkatërron ARN virale dhe nuk lejon transkriptimin e saj, duke mos e lejuar kodin gjenetik të virusit të bjerë në kontakt me sistemin imunitar të njeriut. Një lajm i mirë mbase për tërë njerëzimin dhe një lajm i mirë që zbulimi vjen nga Universiteti i La Sapiencës në Italinë fqinje. Kjo më jep kënaqësi dyfish, se është universiteti ku mora një pjesë të rëndësishme të edukimit tim”, ka shkruar Prifti. “Sipas tij, këto gjetje të njëpasnjëshme dhe shpresëdhënëse janë tregues se nuk është e largët gjetja e një kure për trajtimin e COVID- 19. Ky është një tregues që kura do të gjendet patjetër. Gjithë energjitë e njerëzimit janë fokusuar në këtë. E rëndësishme është që kjo sëmundje do na mësojë shumë. Do na tregojë se kush punon realisht për njerëzimin dhe kush jo! Do tregojë se akademizmi kapitalist, i cili nuk nxit kërkimin shkencor në funksion të njerëzimit, por vetëm të tregut dhe pushtetit, duhet të marrë fund njëherë e mirë”. Profesori ndalet edhe në gjetjet e mëparshme, si dhe në skemat që po aplikohen aktualisht në Itali për trajtimin e kësaj sëmundjeje. Prej disa muajsh, në Itali të infektuarit me koronavirus po trajtohen, përveçse me plazmën e gjakut, edhe me anë të metodës së ozonoterapisë. Ozonoterapia është marrja e gjakut nga pacienti dhe pasurimi i tij me një raport përzierjeje oksigjeni dhe ozoni. “Mendoj që COVID- 19 do të vërë piketa të reja për njerëzimin kudo ku ai është. Prandaj edhe reagimi nuk duhet të jetë vetëm shkencor, por edhe qytetar, moral dhe ligjor. Italia fqinje, universitetet e së cilës po mbrojnë me ngulm thërrmijat e akademizmit puritan dhe atij klasik, po i jep leksione gjithë botës mbi të rejat shkencore për trajtimin e COVID- 19, duke filluar që nga Tocilizumab që ishte gjetje e një mjeku nga Napoli, ozonoterapia dhe tashmë laktoferrina. Ky kërkim shkencor i këtij niveli, me financime nga më të reduktuarit në
Europë, janë arritje të punës vetëmohuese në shërbim të njerëzimit të këtij populli që i ka dhënë aq shumë këtij planeti. Një shembull për të gjithë ne”, ka mbyllur postimin e tij profesor Prifti.
Shkencëtarët kanë zbuluar që laktoferrina mund të jetë çelësi i trajtimit të COVID- 19. Kjo është një proteinë, e cila merret nga nëna dhe shpjegon se pse fëmijët infektohen shumë më pak. Laktoferrina gjendet me shumicë në kulloshtrën e nënës