PS firmos pakt me opozitën e Kuvendit, skema si do ndryshojë Kushtetuta dhe marrëveshja e 5 qershorit
“Votimi më 23 korrik fasadë, zhbëhet një javë më vonë. Prishja e 5 qershorit, akt me pasoja të paparashik uara”
Ashtu sikur pritej, opozita e bashkuar e ka kundërshtuar marrëveshjen e arritur dje në Kuvendin e Shqipërisë mes Partisë Socialiste dhe disa grupeve parlamentare të opozitës që fillimisht të miratohen amendimet në Kodin Zgjedhor dhe një javë më vonë të miratohen ndryshimet kushtetuese, të cilat do të imponojnë ndërhyrje sërish në Kodin Zgjedhor.
Përmes një deklarate të shpërndarë mbrëmë, opozita e bashkuar paralajmëron se miratimi i njëanshëm i ndryshimeve kushtetuese ka pasoja të paparashikueshme për stabilitetin e vendit. Ndërkohë akuzoi Kryeministrin Edi Rama se me marrëveshjen e firmosur dje kërkon të vërë në lojë partnerët ndërkombëtarë, të cilët ishin prezentë në firmosjen e marrëveshjes së 5 qershorit. Po ashtu, opozita e bashkuar thekson se qëllimi real i Kryeministrit nuk është hapja e listave, siç artikulon publikisht, por eliminimi i koalicioneve parazgjedhore.
REAGIMI I OPOZITËS SË BASHKUAR
“Ndryshimi i njëanshëm kushtetues për ndalimin e koalicioneve zgjedhore zhbën të dyja marrëveshjet politike për zgjedhjet, atë të 14 janarit dhe atë të 5 qershorit. Akti i sotëm është dëshmi e planit diabolik të Edi Ramës që të miratojë fillimisht për fasadë Marrëveshjen e 5 qershorit, të vërë në lojë partnerët tanë strategjikë, SHBA- në dhe BEnë dhe vetëm 1 javë më vonë ta zhbëjë marrëveshjen me ndryshime të njëanshme kushtetuese, që ndalojnë koalicionet si subjekt zgjedhor. Edi Rama gënjen kur thotë se po hap listat, sepse pjesën fituese të tyre, 1/ 3- ën e listës e mban të mbyllur, duke dalë zbuluar se i vetmi qëllim është ai i ndalimit të koalicioneve si subjekt zgjedhor. Zhbërja nga Edi Rama e marrëveshjeve të 14 janarit dhe 5 qershorit përbën një akt të rrezikshëm me pasoja të paparashikueshme për stabilitetin e vendit. Ky akt i paprecedentë në 30 vite pluralizëm është, po kështu, një thyerje e rëndë e besimit të partnerëve strategjikë, SHBA dhe BE, që u investuan, përshëndetën dhe vazhdojnë të insistojnë në zbatimin e Marrëveshjes së 5 qershorit pa asnjë ndryshim dhe pa ndryshime kushtetuese që e shkatërrojnë atë. Ky akt tinëzar prej frikacaku tregon tmerrin e Kryeministrit në ikje nga zgjedhjet dhe rrotacionin e pashmangshëm. Opozita e bashkuar garanton të gjithë qytetarët se do të bëjë gjithçka, që faturën e rëndë që ky akt sjell për demokracinë, stabilitetin dhe integrimin e vendit ne Bashkimin Europian, ta paguajë vetëm Edi Rama dhe jo Shqipëria e shqiptarët”.
4- VJETORI I NDRYSHIMEVE KUSHTETUESE
Ndërkohë ish- deputeti i PD- së Oerd Bylykbashi përmes një reagimi bëri një paralelizëm të dy ngjarjeve: miratimit të ndryshimeve rrënjësore në Kushtetutë 4 vite më parë dhe më pas shkeljen e tyre nga maxhoranca, dhe shkeljen e paktit të 5 qershorit që vetë kreu i qeverisë e paralajmëroi pas firmosjes. “Vetëm Edi Rama është i aftë që të bëjë një marrëveshje për të prishur një marrëveshje tjetër. E deklaroi pas 5 qershorit se do ta griste marrëveshjen dhe këtë e bëri fakt sot me 21 korrik me atë karagjozatën që e shiti për marrëveshje. Mos harroni! 21 korriku është katërvjetori i marrëveshjes për Kushtetutën, që u shkel nga Edi Rama menjëherë pas miratimit të saj. Nuk e kapërcen dot veten dhe ta respektojë shprehjen antike romake “Pacta sunt servanda’ ( Paktet zbatohen)”, shkroi bylykbashi në “Facebook”.