Artistët kundër qeverisë, Bregasi: Një mbyllje tjetër e vret ekonominë
“Të gjobiten vetëm bizneset që nuk respektojnë protokollin”
Pas izolimit disamujor dhe sakrificave që bëri biznesi shqiptar dujke ndalur aktivitetin, një tjetër izolim do të ishte vdekjeprurës për ekonominë. I këtij mendimi është kreu i “BiznesAlbania”, Luan Bregasi, i cili shprehet kundër Aktit Normativ të qeverisë për të mos lejuar muzikën pas orës 20: 00 në të gjitha baret dhe lokalet e natës. Bregasi sugjeron që autoritetet të gjobisin bizneset që nuk zbatojnë rregullat ndaj COVID- 19 dhe jo të merren masa drastike për bizneset në të gjithë vendin, veprime këto që sipas tij e vdesin ekonominë. “Një goditje tjetër që mund t’i jepet ekonominë duke e izoluar, duke e mbyllur, do të ishte vdekjeprurëse për biznesin dhe ekonominë shqiptare. Virusi nuk ka orar. Shteti të zbatojë fort rregullat e protokolleve që ka miratuar. Të gjobiten bizneset duke qenë hapur dhe duke mos zbatuar rregullat. Shteti duhet të marrë misionin e operatorit të kontrollit të protokolleve. Në qoftë se për pub- et dhe natën vonë ka mungesë të kontrolleve, mund të ketë masa të veçanta në qytete të veçanta, disko të veçanta ku ka pasur probleme. Unë nuk jam për mbylljen e plotë. Dikush që respekton masat e COVID, të gjithë masat e protokollet, nuk ka përse mbyllet dhe s’ka përse ta vuajë”. Sipas Bregasit, biznesi i mirëkuptoi vendimet e qeverisë të marra përgjatë katër muajve, por tashmë është radha e qytetarëve për të bërë sakrificën e tyre duke zbatuar masat kundër COVID- 19. Kreu i “BiznesAlbania” thotë se ekonomia duhet të ndjekë rrugën e saj duke u hapur gradualisht dhe zbatuar protokollet e miratuara nga qeveria. “Biznesi dhe kapitali, ekonomia e ka bërë një herë sakrificën, katër muajt e parë. Tashmë u bie përgjegjësia njerëzve. Biznesi e ka mirëkuptuar qeverinë në të gjitha vendimet që mori në muajin mars, prill, maj, kur raporti i kujdesit kaloi në favor të shëndetit të njerëzve. Hapja e ekonomisë duhet bërë në mënyrë graduale dhe sigurisht duke zbatuar protokollet e shtetit, pra, shteti ka detyrë të zbatojë protokollet që i ka miratuar vetë. Tashmë i bie të bëjnë sakrificë njerëzit, çka do të thotë të vetëmbrohemi, të vetëkujdesemi, të zbatojmë rregullat që ka vendosur qeveria”. Bregasi foli edhe për situatën ekonomike në vend duke e cilësuar atë tepër të goditur nga pandemia, e veçanërisht sektori i turizmit. “Situata ekonomike në Shqipëri pas krizës së pandemisë është shumë alarmante, shqetësuese. Ekonomia është në shifrat 30- 50 % krahasuar me të njëjtën periudhë të vitit të kaluar. Shifrat më të frikshme i ka turizmi, për shkak të natyrës turistike që ka Shqipëria dhe ekonomia shqiptare. Gati 25% të GDP- së e ka prej turizmit”, nënvizon kreu i “BiznesAlbania”, Luan Bregasi.