Vizita në Kosovë, Bashës i dhurojnë flamurin 108- vjeçar të Isa Boletinit
Numri dy i Partisë Socialiste, Taulant Balla, zhvilloi dje takime me Kryeministrin dhe Presidentin e Kosovës. Fillimisht Balla u takua me Kryeministrin e ri të Kosovës, Avdullah Hotin. Mësohet se tema kryesore e bisedës ka qenë liberalizimi i vizave për Kosovën. Ndërkohë, përmes një postimi në “Twitter”, Balla shkroi se përshëndesin kërkesën e grupeve parlamentare në Parlamentit Europian ndaj Presidencës së Gjermanisë për liberalizimin e vizave. “Mirënjohës për takimin me Kryeministrin Avdullah Hoti. Ne të dy i mirëpresim dhe përshëndesim kërkesat e eurodeputetëve nga grupet kryesore politike të Parlamentit Europian: Progresistët, Partia Popullore Evropiane, Rinovo Evropën dhe të tjerët, duke i kërkuar Presidencës gjermane të miratojë brenda vitit 2020 liberalizimin e vizave për qytetarët e Kosovës”, shkroi Balla. Ndërsa takimi me Presidentin e Kosovës, Hashim Thaçi, është fokusuar te çështja e fundit ku Thaçi u thirr nga Gjykata Speciale. Përmes një postimi në “twitter”, Balla u shpreh se lufta e UÇK- së ishte një luftë e drejtë. “Takim shumë vëllazëror me Presidentin e Kosovës, Hashim Thaçi. Lufta e Ushtrisë Çlirimtare të Kosovës ishte një luftë e drejtë për lirinë e një populli autokton kundër gjenocidit të Millosheviçit. Tërësisht mbështes Presidentin Thaçi se ‘ askush nuk do ta rishkruajë dot historinë e lirisë’ së Kosovës”, shkroi Balla në “Twitter”. Nuk dihet nëse vizita e Ballës në Kosovë ishte e planifikuar më herët, apo erdhi si një kundërpërgjigje ndaj vizitës së kryedemokratit Basha.