SENATI AKADEMIK KUNDËR “PËRVETËSOI KOMPETENCAT E MIA”, KONI SHKARKON ZV. KRYETAREN E SENATIT

Është dashur organizimi i mbledhjes së dytë të Senatit Akademik me prezencën e më shumë se 2/ 3 që rektori të shkarkojë nga detyra zëvendësen e tij në senat, Eliona Kulluri, firmën e së cilës mbajnë shkresat e senatit që rrëzojnë vendimet e rektorit Mynyr Koni. Më 17 korrik ky i fundit ka vendosur ta largojë nga detyra, pas një paralajmërimi vetëm katër ditë më herët. Përmes një shkrese, Koni i kërkon nr. 2 të Senatit të mos përvetësojë kompetencat e tij, si dhe të mos shpërdorojë detyrën duke kryer veprime pa delegimin e kryetarit të Senatit ( vetë atij), pasi në të kundërt do të përballej me përgjegjësi ligjore dhe administrative. “Rezulton se keni marrë përsipër të bëni rolin e kryetarit të Senatit Akademik të UT- së, dhe njëkohësisht edhe të sekretarisë së këtij organi kolegjial. Nisur edhe nga një situatë tjetër e ngjashme si kjo, ju kërkoj të mos veproni në shkelje të ligjit për funksionimin e organeve kolegjiale në shkelje të ligjit për arsimin e lartë, të statusit të UT- së dhe rregullores së zgjedhjeve të UT- së”. Koni vesh me përgjegjësi ligjore Kullurin për firmosjen e dy vendimeve: një në maj, që rrëzon vendimin e tij për shkarkimin e anëtarëve të komisionit zgjedhor, dhe tjetrin në 15 korrik për formatimin e Komisionit të Apelit. Për arsyet e lartpërmendura, rektori ka vendosur zgjidhjen e marrëdhënieve të punës me znj. Eliona Kulluri, personel akademik në Departamentin e Punës dhe Politikave Sociale në Fakultetin e Shkencave Sociale. Kujtojmë që një vendim të ngjashëm rektori e ka firmosur në maj për gjashtë anëtarë të KIZ- it, por u rrëzua nga Senati Akademik që e drejton vetë ai. Është sërish Senati ai që do të mblidhet nesër për të njëjtën gjë.