Zbardhen email- et para mesnate, PD- LSI kërkojnë takim për Kushtetutën, PS: Më 30 korrik ne e votojmë
“Dakordësia mes forcave tona parlamentare do të votohet më 30 korrik, pa diskutim ndryshime nuk ka më”
Kryeministri Edi Rama deklaroi dje se ndryshimet kushtetuese, të cilat imponojnë hapjen e listave dhe heqjen e koalicioneve, do të votohen në Parlament më 30 korrik.
Kreu i qeverisë, në fjalën e tij në Parlament, ftoi opozitën për të dialoguar, por nga ana tjetër pohoi se drafti i ndryshimeve kushtetuese është miratuar në Këshillin e Legjislacionit dhe nuk mund të pësojë ndryshime. Sakaq, kreu i maxhorancës foli edhe për rolin e ndërkombëtarëve. Ndryshe nga 4 vite më parë ku u ndryshua Kushtetuta me ndihmën e partnerëve amerikanë dhe atyre të BE- së, dje kreu i qeverisë tha se për ndryshimet kushtetuese që hapin listat zgjedhore nuk vendosin të huajt, por Parlamenti shqiptar. KRYEMINISTRI RAMA PËR ROLIN E
NDËRKOMBËTARËVE: “Dëgjova në mënyrë të përsëritur që Këshilli Politik paska krijuar një aleancë globale me Shteteve të Bashkuara, Bashkimin Europian, OSBE/ ODIHR dhe nuk e di kush tjetër.
Nuk është e vërtetë. Nuk i vëmë ndonjëherë në diskutim detyrimet tona në kuadrin e aleancave të natyrave të ndryshme, që nga aleancat ushtarake deri tek aleanca të tjera për çështje që shtrohen në institucione dhe organizata ndërkombëtare. Nuk vëmë ndonjëherë në diskutim detyrat tona këtu, për të mos lëshuar asnjë fije me prioritetet që janë tonat, por edhe të partnerëve tanë në radhë të parë, që nga terrorizmi deri te krimi i organizuar. Ama, kur vjen puna për të vendosur, do hapim listat apo nuk do hapim listat, më vjen keq, por këtë e vendosim ne, se pastaj do ishte fundi. Këtë e vendosim ne dhe nuk kemi asnjë problem që ta diskutojmë e t’ua themi siç ua kemi thënë e, siç besoj, që do vazhdojmë ta themi deri kur të jetë e nevojshme, por nuk besoj se do të jetë e nevojshme për një kohë të gjatë, sepse ky Kuvend do të hapë listat në datën 30 korrik dhe kjo është marrëveshja, e bërë edhe me opozitën që ditën e parë. Që kur ikën ata që ishin në radhët e para e Myslimi e Rudina, që ishin andej nga fundi dolën këtu përpara, filloi daullja ‘ lista të hapura, lista të hapura’ dhe nuk u ndal kurrë. Tani është në nderin tonë, nuk është në dobësinë tonë që ne këtë daulle, me vështirësi edhe për arsye të rrethanave që u krijuan, filluam ta dëgjojmë”.
NDRYSHIMET KUSHTETUESE “Dakordësia mes forcave tona parlamentare do të votohet më 30 korrik, pa diskutim. Pretendojnë që Këshilli Politik nuk e paska mbaruar punën, paska edhe ca gjëra të tjera. U themi dakord, hajdeni të diskutojmë çfarë janë këto gjërat e tjera. Por ndërkohë kemi dhe këtë gjënë tjetër këtu që duam ta diskutojmë me ju. Ju s’mund ta ndryshoni dot, se nuk e ndryshojmë dot, as ata, as ne më se çfarë është shkruar aty. Thjesht më 30 korrik e votojmë, por ndryshime aty, shkruaj ashtu, shkruaj kështu nuk ka më, se e tillë është procedura. Por, ama, ka gjëra për të diskutuar sepse vazhdojnë të thonë do ndalohen koalicionet, se kanë hallin mos i ndajmë me zor. Në fakt, ne nuk duam që ata të ndahen, duam që ata të rrinë bashkë. Në këtë rast, është interes puro politik”.
DEPOLITIZIMI “Sot, unë jam me mendje i bindur që do ta votojmë - dhe duhet ta votoni të gjithë, edhe Myslimi, - 5 qershorin, jo sepse mua më pëlqen, nuk më pëlqen, përkundrazi, unë kam një problem të madh me 5 qershorin: mosdepolitizimin e administratës zgjedhore. Është fyese për Shqipërinë, për dhjetëra, mijëra njerëz që janë në punë, mësues, mësuese dhe pastaj në të gjitha vendet e tjera të punës që të konsiderohen hajdutë votash në potencë dhe ndërkohë administrimi politik të konsiderohet akoma si garanci për integritetin e procesit zgjedhor. Kjo është fyese. Por, ky është lëshimi i madh, i pamerituar totalisht për Lulzim Bashën dhe për lidershipin e opozitës jashtëparlamentare, por i merituar për votuesit e tyre, për zgjedhësit e tyre, për demokratët që s’duan të më shikojnë me sy mua, s’duan të shikojnë me sy qeverinë tonë, s’duan të shohin me sy PS në shumicë, sepse dhënia e mesazhit të barazisë në proces ka rëndësi për ta. Për ne, natyrisht ne nuk dalim të dëmtuar në sensin partiak. Unë e mirëkuptoj Myslim Murrizin kur thotë që ky është skandal. Është skandal që në 2020- ën Shqipëria mos t’ua japë këtë detyrë mësuesve, mësueseve, njerëzve që punojnë në shtet me idenë se ata mund të vjedhin. Ideja e përjashtimit të mësuesve dhe ideja e një administrate zgjedhore me persona që nuk janë as në punë dhe as në parti, është një absurd. E para, duhen mijëra njerëz. E dyta, çfarë detyrimi ligjor do të kishte një avokat, një veteriner, një infermiere që punon në privat, nuk e di, numëroni edhe profesione të lira, arkitekt, nëse do t’i thuhej, ti duhet të shkosh të numërosh votat e Myslim Murrizit në Këmishtaj dhe çfarë pasoje do të kishte nëse do thoshte ‘ nuk dua’. Asnjë pasojë, nuk e detyron dot. Shumë e thjeshtë! Nuk e detyron dot”.