Pensionet, emrat e rinj të ISSH që marrin shtesën

ISSH ka miratuar dje listën e re të pensionistëve që marrin shtesën e pensionit. Gazeta boton emrat e minatorëve, metalurgëve e naftëtarëve që përfitojnë në Tiranë e rrethe

Janë 216 pensionistë nga radhët e minatorëve, naftëtarëve dhe metalurgëve, që iu është miratuar shtesa e re.

Instituti i Sigurimeve Shoqërore ka publikuar një ditë më parë emrat e përfituesve në Tiranë dhe rrethe, për të cilët ka përfunduar llogaritja dhe shtesa mund të tërhiqet pranë çdo pike ku edhe bëhet shpërndarja e pensionit.

Gjithsej janë mbi 23 mijë pensionistë që përfitojnë. Instituti i Sigurimeve Shoqërore kishte shprehur angazhimin për përmbylljen e këtij procesi brenda muajit korrik. Por, për shkak të pandemisë COVID- 19 dhe vendimit të qeverisë për të zgjeruar kategoritë përfituese nga skema suplementare, ka ende dosja, të cilat pritet të merren në shqyrtim në ditët në vijim. Nga rritja përfitojnë të gjithë minatorët, naftëtarët dhe metalurgët që kanë mbi 6 vite punë dhe kanë ushtruar profesione të kategorizuara të vështira dhe shumë të vështira do të jenë pjesë e skemës. Ligji për trajtimin suplementar, miratuar gati një vit më parë, parashikon që rritja për minatorët të bëhet me 1 për qind për çdo vit pune në nëntokë, ndërsa për naftëtarët dhe metalurgët me 0.6 për qind. Në këto kushte, shtesa varion mesatarisht nga 12 për qind deri në 20 për qind mbi masën e pensionit. Edhe pse është bërë një vit nga zyrtarizimi i ndryshimeve ligjore, afati i aplikimeve nuk është mbyllur. Pensionistët që nuk kanë dërguar ende kërkesë, mund ta bëjnë këtë në çdo kohë. Për procesin e aplikimit, krahas kërkesës, pensionistët duhet të dorëzojnë edhe një kopje të kartës së identitetit si edhe çdo dokument tjetër që vërteton llojin dhe periudhën e punës për efekt pensioni.