Debat në Këshillin Politik, Maxhoranca nuk tërhiqet nga loja e koalicioneve
Bylykbashi: Ndryshimet e njëanshme prekin marrëveshjen. Gjiknuri: Gjeni deputetët për të bërë amendime në Kushtetutë
Këshilli Politik për Reformën Zgjedhore nuk ka arritur që të gjejë të mesmen e përbashkët në lidhje me ndryshimet kushtetuese.
Pas debatit publik të hapjes së listave, opozita e bashkuar shkoi dje me propozimin që listat të hapen 100% dhe jo 75% siç ka kërkuar Kuvendi, por me kushtin që të mos ndryshohet formula e koalicioneve parazgjedhore. Gjithashtu, opozita ka kërkuar që Kuvendi të tërhiqet nga drafti për ndryshimet kushtetuese, pasi riformulimi i nenit 64 dhe 68 prek marrëveshjen e 5 qershorit dhe të 14 majit.
DEBATI
Gazeta “Panorama” ka mësuar përmes burimeve se përfaqësuesi i PD- së, Oerd Bylykbashi, është shprehur ndër të tjera se heqja e koalicioneve parazgjedhore sikurse në formulën e 2017ës prek elementet thelbësorë të sistemit. “Propozimi i PSsë për ndryshime të njëanshme të Kushtetutës, të cilat lidhen me zgjedhjet dhunon marrëveshjen politike të 5 qershorit. Këto ndryshime kushtetuese në veçanti zhbëjnë disa nene të marrëveshjes së 5 qershorit, përmes të cilave jo vetëm ruhen koalicionet parazgjedhore si subjekt zgjedhor, por edhe çdo parti brenda koalicionit vazhdon të ruajë të drejtën dhe mundësinë të konkurrojë me listat e veta të veçanta. Ndryshimi i njëanshëm i PS- së prek jo vetëm elemente të qenësishëm të sistemit që kanë impakt të drejtpërdrejtë te rezultati, por gjithashtu prek të gjithë procesin e administrimit zgjedhor, duke hequr koalicionet parazgjedhore si subjekt zgjedhor dhe duke ndryshuar për rrjedhojë formulën e ndarjes së mandateve; duke ndryshuar konceptin e ndarjes administrative të zonave zgjedhore dhe organizimit elektoral”, mësohet se është shprehur Bylykbashi në mbledhjen me dyer të mbyllura. Në vijim ai i ka kujtuar përfaqësuesit të maxhorancës dhe znj. Hajdari se sipas praktikave të mira të Opinionit të Venecias Kushtetuta nuk ndryshohet 1 vit para zgjedhjeve. Ndërkohë tani ndodhemi rreth 8 muaj para zgjedhjeve. Në këtë kuadër, Bylykbashi ka kërkuar që nëse vërtet është qëllimi për hapjen e listave, ato mund të realizohen në ligjin zgjedhor pa pasur nevojën për ndryshime në Kushtetutë. “Hapja e listave nuk përbën asnjë arsye për të ndryshuar formulën ekzistuese të koalicioneve parazgjedhore dhe ndarjen e zonave zgjedhore. Koalicionet janë një mekanizëm ligjor që garanton mundësinë e partive politike për t’u grupuar së bashku dhe për të ruajtur të padeformuar vullnetin e qytetarëve. Hapja e listave nuk ka asnjë lidhje me formulën e koalicioneve apo mënyrën e shpërndarjes së mandateve brenda koalicioneve, por ka të bëjë vetëm me garën brenda listës së një partie politike” ka vijuar Bylykbashi gjatë takimit.
REAGIMI
Nga ana tjetër, përfaqësuesi i maxhorancës nuk ka lëshuar terren sa i përket draftit të ndryshimeve kushtetuese. Sipas Gjiknurit, drafti i amendimit të dy neneve në Kushtetutë adresojnë edhe shqetësimet e PD- LSI dhe aleatëve për hapjen e listave 100% dhe për formulën e koalicioneve. Ndërkohë Gjiknuri ka kërkuar që nëse opozita e bashkuar kërkon të bëjë amendime në Kodin Zgjedhor, atëherë duhet të gjejë 28 deputetë nismëtarë në Parlament sipas procedurës parlamentare për të depozituar nismën për ndryshime kushtetuese. “Amendamenti kushtetues i opozitës parlamentare krijon mundësinë për të adresuar të gjitha shqetësimet dhe meraket që ka PD- ja. Amendamenti nuk pengon hapjen 100% të listave, por vë një dysheme duke thënë jo më pak se 2/ 3 e hapur. Edhe çështja e formulimeve për koalicionet, edhe për 100% hapje listash, është e mundshme të rregullohen në Kodin Zgjedhor. Nëse doni pastaj të bëni propozime në formë amendamentesh kushtetuese, duhet ndjekur rruga parlamentare me firmat”, mësohet se i është kundërpërgjigjur Gjiknuri opozitës.