ÇFARË THA ‘ VENECIA’ PËR LIGJIN E BETIMIT TË GJYQTARËVE KUSHTETUES
Komisioni i Venecias në opinionin që dha në lidhje me ligjin “Për organizimin dhe funksionimin e Gjykatës Kushtetuese të Republikës së Shqipërisë”, theksoi se betimi te Presidenti përbën një parakusht për fillimin e punës. “Duket e arsyeshme që Presidenti të konsiderojë se duhet të respektojë radhën e sekuencës edhe për zgjedhjen aktuale të kandidatit: nëse sekuenca ekziston, ajo duhet të ketë një ndikim në rendin e emërimit nga një listë e vetme. Për më tepër, nëse Presidenti do të kishte zgjedhur dy kandidatë, Kuvendi do të dispononte një listë me më pak se tre kandidatët, numri minimal i kërkuar nga Kushtetuta. Rezervat e bazuara mbi këtë arsyetim nuk duken të pajustifikuara. Prandaj, sjellja e Presidentit në lidhje me këtë nuk justifikon shkarkimin e tij. Në këtë drejtim, Komisioni i Venecias thekson se neni 129 i Kushtetutës parashikon që një gjyqtar i Gjykatës Kushtetuese fillon detyrën e tij / saj pasi të bëjë betimin para Presidentit. Është e qartë se betimi para Presidentit është parakusht për të marrë detyrën”, thuhej mes të tjerash në opinionin e “Venecias”.
Meta tha se do t’i dekretojë ndryshimet menjëherë sapo t’i vijnë nga Kuvendi dhe të verifikojë se nuk është bërë asnjë ndryshim esencial nga ajo që është dakordësuar në Këshillin Politik.
5 QERSHORI Sipas Presidentit, kalimi i kësaj marrëveshjeje është një hap i madh për vendin sa i përket edhe integrimit europian, pasi kemi të bëjmë me një nga kushtet për uljen në tryezën e negociatave të anëtarësimit për herë të parë. “Ende nuk kanë ardhur ndryshimet e bëra nga Kuvendi në Presidencë. Sapo të vijnë do të verifikohen edhe njëherë nëse janë zbardhur tamam ashtu siç është dakordësuar nga Këshilli Politik dhe do të dekretohen menjëherë. Së dyti, që do të bëj menjëherë dekretimin e ndryshimeve që kanë ndodhur. Së treti, që Këshilli Politik do të vazhdojë punën, sepse ka mjaft çështje ku duhet të vazhdojë dakordësimi, siç janë ato për parandalimin dhe ndëshkimin e blerjes së votës e shumë fenomene të tjera mjaft shqetësuese. Për këtë çështje sot kam takuar edhe kryetarin e Partisë
Demokratike dhe të opozitës së bashkuar, zotin Basha. E kam falënderuar për kontributin që kanë dhënë për marrëveshjen e 5 qershorit. Njëkohësisht, e kam nxitur që të mos bien pre e asnjë provokimi për t’i larguar nga tryeza gjithëpërfshirëse e Këshillit Politik, por të vazhdojnë të kontribuojnë atje pa u ndaluar dhe pa njohur madje as një ditë pushimi”, tha Meta. NDRYSHIMET KUSHTETUESE Meta e cilësoi nismën e maxhoranës dhe opozitës parlamentare për të ndryshuar Kushtetutën për hapjen e listave si një sjellje që do të çonte menjëherë në penalizimin e procesit të integrimit të vendit. “Për sa u takon ndryshimeve të njëanshme të Kushtetutës, më duket se këtë gjë e kam bërë shumë të qartë dhe jam shumë i prerë për këtë çështje. Por nuk dëshiroj të flas më shumë, sepse nuk do të doja të besoja që dikush do të ndërmerrte një iniciativë të tillë, e cila sigurisht do të sillte një situatë krejt të re, por në radhë të parë, do të sillte një penalizim të menjëhershëm të vendit në raport me procesin e integrimit europian. Tani është koha për të reflektuar dhe për të mos cenuar ‘ 5 qershorin’, sepse cenimi i ‘ 5 qershorit’ është një penalizim i menjëhershëm me pasoja imediate për të ardhmen europiane të Shqipërisë. Por kush prek ‘ 5 qershorin’ apo kush shpik një datë vetë, me mendjen e vet, që të hedhë në erë ‘ 5 qershorin’, duhet ta dijë që nuk ka vetëm 30 korrik! Ka 31 korrik, ka 2 gusht, domethënë ka ditë të tjera. Nuk ndalon as jeta, as... përkundrazi! Por aty pastaj ka një datë ku ndahen dy epoka. Dakord? Dhe pastaj nuk ka më rikthim në tryeza nga ata që përmbysin tryezat dhe kërkim të të drejtave që i takojnë një pakice pasi ke dhënë shembullin më të poshtër dhe më kriminal se si për interesa të pushtetit tënd apo jo, je gati të përmbysësh të ardhmen europiane të një vendi të tërë”, theksoi Presidenti. PËR RAMËN DHE
BASHËN Ndërkohë pas konferencës, në një dalje tjetër për mediat pak minuta më vonë, Presidenti Meta vlerësoi propozimin e opozitës së bashkuar për hapjen 100% të listave dhe nuk e besoi se Kryeministri mund të dalë kundër këtij varianti. “Nuk e besoj të jetë i vërtetë, duhet të jetë fakenews. Përshëndes këtë akt të përgjegjshëm dhe historik të Bashës dhe opozitës së bashkuar që ka dhënë dakordësinë e tij të hapjes 100% të listave, të kandidatëve për deputetë. Në këtë mënyrë, Basha tregon jo vetëm lidership, përgjegjshmëri dhe respekt për qytetarët shqiptarë, por edhe shlyen një gabim të PD- së, që votoi atëherë për mbylljen e listave”, tha Meta.