Mrekullia, nëna pa një veshkë dhe mushkëri ka sjellë në jetë foshnjën
Një nënë e re 27- vjeçare pa një veshkë dhe mushkëri ka përfunduar me sukses rrugëtimin e saj të shtatzanisë, duke sjellë në jetë shëndoshë e mirë vajzën e saj. Sipas mjekëve të Spitalit “Mbretëresha Geraldinë” në kryeqytet, ky është një rast shumë i rrallë, sepse nëna e re ka mungesë të një pulmoni dhe një veshke dhe, edhe në literaturë, mbi 90% e këtyre rasteve nuk finalizohen me sukses, por për fat të mirë çdo gjë ka shkuar mirë për 27vjecaren nga periferia e Tiranës dhe foshnjën e saj, që gëzon shëndet të plotë. “Kjo është një mrekulli e jetës. Ne kemi një ekip të mrekullueshëm, që edhe në kohë pandemie bëjnë një punë shumë të madhe në të gjithë sistemin tonë shëndetësor, ku po ofrohen shërbime jo vetëm për pacientët me COVID, por për të gjithë qytetarët që kanë nevojë”, tha ministrja e Shëndetësisë, Ogerta Manastirliu, pasi vizitoi nga afër nënën dhe foshnjën e porsalindur. Duke falënderuar mjekët dhe infermierët për punën e palodhur dhe kujdesin ndaj nënave dhe fëmijëve, Manastirliu është shprehur se në maternitetin simbol të Tiranës do të realizohet një investim 6.4 milionë euro për dyfishimin e kapaciteteve dhe pajisjen me aparatura të teknologjisë së lartë në këtë maternitet. “Kemi kohë që po punojmë dhe lajmi i mirë është që jemi gati për fillimin e procedurave për rindërtimin dhe zgjerimin e Spitalit ‘ Mbretëresha Gerladinë’, një investim prej 6.4 milionë eurosh nga qeveria shqiptare, i programuar në buxhetin e këtij vit”, tha Manastirliu. Në Maternitetin “Mbretëresha Geraldinë” është hapur një pavijon i veçantë për nënat e dyshuara apo të prekura nga COVID- 19. Ministrja tha se të gjitha masat e marra në maternitete kanë rezultuar efikase për mbrojtjen e nënave dhe bebeve nga epidemia e shkaktuar nga SARS- COV- 2. “Ky pavijon i veçantë, i dedikuar për rastet COVID, me staf të dedikuar, është një ndër masat për përballimin e kësaj situate, edhe në maternitete, ku po bëhet një punë e jashtëzakonshme për sigurinë e nënave dhe të porsalindurve”, tha Manastirliu. Ministrja e Shëndetësisë deklaroi po ashtu se po vijojnë investimet për fuqizimin me aparatura të teknologjisë së lartë për terapitë intensive në të gjithë spitalet për përballimin e situatës së shkaktuar si pasojë e COVID- 19, por edhe patologjitë e tjera.