Ndryshimet kushtetuese, tjetër paralajmërim nga Gjermania
Raporteri për Shqipërinë në CDU/ CSU, Schmidt: Kujdes! Ndryshime bëhen nëse partitë e rëndësishme bien dakord . Kim: Duhet gjithëpërfshirje
Ndërsa na ndajnë edhe pak ditë nga 30 korriku kur kreu i qeverisë Edi Rama ka paralajmëruar ndryshimet kushtetuese qoftë edhe pa dakordësinë e opozitës politike, nga Gjermania vjen një tjetër paralajmërim.
Këtë herë është raportuesi për Shqipërinë në koalicionin qeverisës në Gjermani CDU/ CSU, Christian Schmidt. Duke iu referuar lajmit më të hershëm të marrëveshjes mes partive politike, bazuar në dakordësinë e 5 qershorit, ish- ministri në qeverinë e kancelares Merkel e konsideron atë një sukses të madh që forcon demokracinë në Shqipëri. Ndërkohë, tërheq vëmendjen që ndryshimet e tjera duhet të bëhen me dakordësinë e forcave të rëndësishme politike brenda dhe jashtë Parlamentit. “Me shqetësim të madh po shoh se Partia Socialiste po tenton ndryshime të tjera jashtë marrëveshjes: konkretisht po tenton heqjen nga Kushtetuta të së drejtës për koalicione parazgjedhore. Për të favorizuar vetveten? Bëni kujdes! Ndryshime të tjera bëhen vetëm nëse partitë e rëndësishme brenda dhe jashtë Parlamentit bien dakord për to. Jam i bindur se Kryeministri Rama, i cili është edhe kryetar i radhës së OSBE- së, do ta mbrojë frymën e marrëveshjes së 5 qershorit mes të gjitha partive. Besimi reciprok është i domosdoshëm!”, shkruan raporteri i CDU/ CSU- së për Shqipërinë në Bundestag. Megjithatë as ky paralajmërim nuk bëri që kreu i qeverisë të tërhiqej. Madje ai u shpreh në Parlament brenda një jave se për ndryshime që kanë të bëjnë me hapjen e listave nuk pret ndërhyrje nga asnjë partner ndërkombëtar.
AMBASADORËT Gjithashtu paraditen e ditës së djeshme në zyrën e kreut të qeverisë zbarkuan edhe dy ambasadorët, Yuri Kim e SHBA- së dhe Luigi Soreca i Bashkimit Europian. Takimi kokë më kokë me kreun e qeverisë dhe dy diplomatët ka zgjatur rreth një orë dhe përmes burimeve mësohet se ambasadorja Kim ka falënderuar kreun e qeverisë për lidershipin e miratimit të marrëveshjes dhe kërkuan që çdo ndryshim tjetër të bëhet me gjithëpërfshirje. “Kim e falënderoi Kryeministrin për udhëheqësinë e tij në sigurimin e miratimit të marrëveshjes së 5 qershorit dhe mirëpriti vazhdimin e diskutimeve të ndërsjella në Këshillin Politik në lidhje me masat shtesë. Siç kemi thënë publikisht, ambasadorja theksoi rëndësinë që të gjitha palët të marrin pjesë në mirëbesim, në mënyrë gjithëpërfshirëse dhe transparente”, bënë me dije burimet diplomatike. Edhe kryediplomati i BE- së në Tiranë, Luigi Soreca, ka falënderuar Ramën për miratimin e ndryshimeve në Kodin Zgjedhor, por ai ka kërkuar që çdo ndryshim tjetër të bëhet me gjithëpërfshirje dhe në frymën e marrëveshjes politike. “Ambasadori u takua me Kryeministrin së bashku me ambasadoren Kim për një orë këtë mëngjes. Ai falënderoi Kryeministrin për angazhimin e tij në miratimin e marrëveshjes së 5 qershorit dhe e ftoi atë që të punojë me shpejtësi për zbatimin e saj. Në të njëjtën kohë, ai mirëpriti vazhdimin e diskutimeve në Këshillin Politik në lidhje me ndryshimet shtesë, për të respektuar frymën dhe rezultatet e 5 qershorit. Gjithëpërfshirja është thelbësore kur bëhet fjalë për çështjet elektorale”, bënë me dije burimet pranë Ambasadës së BE- së.