Jep dorëheqjen nga sistemi i drejtësisë gjyqtari Alaudin Malaj
Gjyqtari i Apelit Alaudin Malaj ka dhënë dorëheqjen e tij nga sistemi i drejtësisë. Në letrën që Malaj i drejtohet kryetares së Këshillit të Lartë Gjyqësor argumentohet se dorëheqja e tij vjen si pasojë e nisjes së një marrëdhënieje të re pune nga data 1 gusht. “Duke pasur parasysh se dorëheqja nga detyra dhe mbarimi i statusit të magjistratit është një proces automatik, i detyrueshëm, një algoritëm, kam pranuar gjithashtu edhe heqjen dorë nga ky status. Unë jam plotësisht i bindur në ushtrimin nga ana juaj të kompetencave kushtetuese dhe ligjore për të pranuar dhe vijuar sa më shpejt me këtë kërkesë, pasi detyra e re më kërkon që ky vendim të merret sa më shpejt të jetë e mundur”, thuhet në kërkesën e dorëheqjes. Malaj falënderon ata që i kanë ndenjur pranë, përfshirë familjarët dhe shprehet se i ka qëndruar kurdoherë besnik Kushtetutës. “Askush nuk është i pagabueshëm, as unë, por i kam qëndruar besnik Kushtetutës”. Letrën e dorëheqjes Alaudin Malaj ia ka dorëzuar pak ditë më parë sekretarisë së Këshillit të Lartë Gjyqësor, këshill i cili pritet që në ditët në vijim të marrë një vendim konkret për këtë çështje. Në letrën e dorëheqjes Malaj shpjegon se ka punuar pranë sistemit të drejtësisë qysh prej vitit 1993, duke shërbyer në disa gjykata të vendit, ku kulmi i karrierës së tij ka qenë drejtimi i Gjykatës së Apelit Tiranë. “… kam pasur privilegjin të punoj në disa gjykata të vendit tim dhe të jem kryetar në Gjykatën e Apelit Tiranë, dhe të lë gjurmë pozitive në karrierën time. Prandaj, ndihem krenar për vete, kolegët, por mbi të gjitha, familjen time …”, shkruan Malaj.