“Më rrezikon jetën”, Safet Bajri kallëzon në SPAK drejtorin e Burgjeve
Safet Bajri, nëpërmjet avokatit të tij Arbër Hoxhaj, bëri dje një kallëzim penal në SPAK ndaj Drejtorit të Përgjithshëm të Burgjeve, Agim Ismaili. Safet Bajri është i dënuar për llogari të Belgjikës dhe po vuan dënimin në IEVP Fier. Kallëzimi penal i tij ndaj kreut të Burgjeve, Agim Ismaili, vjen pas kërkesave të përsëritura për transferimin e tij në IEVP Reç. Ai e ka kallëzuar Ismailin në Prokurorinë e Posaçme për “Shpërdorim detyre”, duke argumentuar, midis të tjerave, në kallëzim se qëndrimi i mëtejshëm në Fier i rrezikon jetën nga persona të tjerë të dënuar aty.
KALLËZIMI Në bazë të nenit 66/ 2 të Ligjit Nr. 8328, datë 16.4.1998 “Për të drejtat dhe trajtimin e të dënuarve me burgim dhe të paraburgosurve”, i cili sanksionon se: transferimet duhet të favorizojnë mundësi që të dënuarit ta kryejnë dënimin pranë vendbanimeve të familjeve të tyre”, kam kërkuar me kërkesën e dt. 12.06.2020 për kompetencë Drejtorisë së Përgjithshme të Burgjeve, transferimin në IEVP REÇ, për shkak se familja ime jeton në Shkodër. Gjithashtu, kërkesën time e kam mbështetur në faktin se çështja ime është tepër e përfolur mediatikisht. Nga ana e Agim Ismailit, Drejtor i Drejtorisë së Përgjithshëm të Burgjeve, nuk është marrë në konsideratë kjo kërkesë, duke shpërdoruar detyrën e tij e më ka transferuar në IEVP Fier. Si pasojë e veprimeve të drejtorit të Burgjeve jeta ime është në rrezik, duke vuajtur dënimin në IEVP Fier. Për këtë arsye kam kërkuar vazhdimisht nga drejtori i Burgjeve, Agim Ismaili, të transferohem në IEVP Reç, aty ku edhe kam familjen më pranë.