“Vrasje e prostitucion”, OFL u kërkon justifikimin e pasurisë 5 të dënuarve
Operacioni Forca e Ligjit u ka nisur kërkesat me shkrim për vetëdeklarimin e burimeve të pasurisë 5 shtetasve të dënuar për krime të rënda. Ata dyshohet se i kanë vënë pasuritë nëpërmjet veprimtarisë së paligjshme. Konkretisht, kërkesa për justifikimin e pasurisë u është nisur shtetasve: Kastriot Maksuti, banues në Korçë, i dënuar nga Gjykata e Shkallës së Parë për Krimet e Rënda Tiranë, me burgim të përjetshëm, për veprat penale “Vrasja në rrethana të tjera cilësuese” dhe “Armëmbajtja pa leje”; Nek ( Skënder) Driza, banues në Durrës, i dënuar nga Gjykata e Krimeve të Rënda, për veprën penale “Trafikimi i narkotikëve, kryer në bashkëpunim”; Arjan Kapo, banues në Durrës, i dënuar nga Gjykata e Durrësit për veprën penale “Shfrytëzimi i prostitucionit në rrethana rënduese”; Arben Plaku, banues në Durrës, i dënuar nga Gjykata e Durrësit për veprën penale “Shfrytëzimi i prostitucionit në rrethana rënduese”; Eduart Myftari, banues në Durrës, i dënuar nga Gjykata e Durrësit për veprën penale “Vjedhja me armë”. “Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL- së dhe më pas përgjigjet e marra do t’i dërgohen SPAK- ut për veprime të mëtejshme. OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të të gjithë personave që janë subjekt i Ligjit Special. OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë”, thuhet në njoftimin zyrtar të Policisë së Shtetit. Ndërkohë, pasi të dënuarit e mësipërm të dorëzojnë në Polici formularët e deklarimit të pasurisë, ato më pas do të dërgohen në SPAK, ku do të bëhen verifikimet e mëtejshme të pasurisë së tyre. Nëse Struktura e Posaçme Antikorrupsion do të verifikojë gjatë veprimeve hetimore që pasuria e deklaruar nga të dënuarit e mësipërm është vënë si pasojë e aktiviteteve kriminale, atëherë kjo pasuri do të përfundojë e sekuestruar deri në përfundim të procesit gjyqësor.