Budina, kërkesë Ramës: Më lejoni të jap një shfaqje në truallin e Teatrit
"Profeti i kokoshkave", personazhi delirant që e mendon veten zot të botës. Aktori- Kryeministrit: Jeni i ftuar, natyrisht si spektator!
Në ditën e 72- të prej shembjes së Teatrit Kombëtar dhe atij Eksperimental "Kujtim Spahivogli", regjisori dhe aktori Edmond Budina bën një kërkesë mediatike për Kryeministrin e vendit, Edi Ramën.
Ai i kërkon kreut të qeverisë, që siç thotë, tanimë sillet si pronar i vendit, ta lejojë të mbajë një shfaqje në truallin ku qe kompleksi teatror. Bëhet fjalë për një tekst të shkruar nga vetë aktori gjatë periudhës së pandemisë e që do të vihet në skenë dhe interpretohet nga vetë ai. Siç tregon, në fokus të rrëfimit është një personazh delirant, që e mendon veten si zot të botës. "Ka të bëjë edhe me dhunën e këtij personazhi, që i duket vetja sikur është zot dhe profet i kokoshkave, siç e tregon dhe titulli. Ka brenda ironi, sarkazëm, grotesk, dhimbje dhe dramë", shprehet aktori, duke theksuar se historia nuk i adresohet asnjë personi konkret. Sa i përket Kryeministrit, ai është i ftuar si spektator, dhe siç shprehet Budina, para aprovimit të lejes mund të kontrollojë edhe "tekstin, konceptin regjisorial e çdo informacion tjetër, që do ta shikojë si të nevojshëm".
"KAMMERSPIEL" ATY KU QE TEATRI Regjisori Edmond Budina e shikon truallin e Teatrit Kombëtar si të përshtatshëm për shfaqjen e tij, jo vetëm për historinë, dhe si "vendi që shqiptarët njohin si teatër", por edhe për të dhënë një mesazh. "Duam të themi se ne jemi për art e jo për dhunë. E kemi treguar këtë gjatë 2 viteve e 4 muajsh me mbi 80 shfaqje dhe do të vazhdojmë ta bëjmë", thotë ai. Me Shfaqjen e tij "Profeti i kokoshkave" ai kërkon të sjellë një mënyrë të bëri teatër jo shumë të lakuar në vend, siç është teatri i dhomës, ose i ashtuquajturi "Kammerspeil". Në shfaqje të tilla, që bazohen mbi kohën, vendin dhe veprimin, publikut i jepet mundësia të shikojë më nga afër aktorin, interpretimin, lëvizjet e mimikën e tij. "Trualli i Teatrit është perfekt për këtë shfaqje, dhe kushtet nuk pengojnë, madje i përshtaten më së miri. Është bërë nëpër botë teatër, dhe në rrethana e ambiente më të vështira", thotë aktori.
Sa i përket mundësisë për një përgjigje negative ndaj kësaj kërkese ( apo mospërgjigje), aktori thotë se është i gatshëm që ta japë shfaqjen e tij në një tjetër hapësirë që do t'i ofrohej. "Meqenëse për çdo hapësirë publike duhet t'i kërkojmë leje Kryeministrit dhe kreut të Bashkisë, pasi ata e kanë zaptuar këtë vend, në rast të një përgjigjeje negative, unë do të kërkoj një hapësirë të lirë në këtë vend. Çdo hapësirë e lirë mund të jetë një skenë teatrore dhe ne duhet t'i mëshojmë këtij fakti, që teatri të hyjnë në çdo qelizë të këtij vendi", thotë ai.
BUDINA I PËRGJIGJET IRONISË SË RAMËS Pak ditë pas shembjes së Teatrit Kombëtar, që shënoi edhe fundin e karantinës, Kryeministri i vendit në fjalën e tij përballë deputetëve, shumica e të cilëve ishin pozicionuar përmes votës pro shembjes, u përpoq të justifikonte aktin. Në fjalën e tij, përpos se solli në valle luftën e minjve të godinës në të cilën protestuesit mund të kishin rënë dëshmorë, u mor edhe me aktorin Edmond Budina. Në tentativën e tij për të minimizuar kontributin e protestuesve në fushat që lëvrojnë, ose siç u shpreh "për t'u thëne njerëzve, kush janë e ç'na kanë dhënë", ai e tregoi Budinën si një aktor që gjatë karrierës kishte luajtur role joprotagoniste. "Unë e njoh si aktor dytësor", tha ai . Përgjigjen për këtë Budina e dha pranë sheshit të Teatrit, tashmë të rrethuar. "Unë bëj teatër. Ndonëse aktor i kategorisë së dytë, të tretë apo të shtatë, kjo ka pak rëndësi. Unë bëj teatër dhe përpiqem t'i sjell spektatorit idenë se dhunës së pushtetit do t'i përgjigjemi me art, siç e kemi bërë deri më tani", u shpreh aktori. POLITIKAN?! BUDINA: JO, FALEMINDERIT!
ARTI ËSHTË GJUHA IME! Emdond Budina tregohet i prerë sa i përket mundësisë për t'u bërë pjesë e politikës. "Mbetem artist, është arti gjuha ime dhe nuk kam ndërmend t'i futem politikës". Po ashtu, ai përjashton mundësinë që Aleanca për Mbrojtjen e Teatrit të bëhet pjesë e ndonjë koalicioni politik, pasi nuk është krijuar si një formacion i tillë.