Qeveria e re maqedonase; BDI, LSDM dhe BESA, drejt paktit
BDI duket se është tërhequr nga kërkesa për Kryeministër shqiptar
Në Maqedoninë e Veriut flitet se parimisht është rënë dakord për një koalicion qeverisës mes LSDM- së dhe Besës me BDI- në e Ali Ahmetiti, pas kapërcimit të kërkesës së këtij të fundit për një Kryeministër shqiptar.
Sipas TV21, tashmë kanë filluar formalisht bisedimet mes partive fituese në zgjedhjet parlamentare të 15 korrikut. Të hënën, burime nga të dyja partitë fituese konfirmojnë për TV21 se këtë prej sot do ta bëjnë edhe formalisht.
Dy ditë më parë, Komisioni Shtetëror i Zgjedhjeve në Maqedoninë e Veriut ka shpallur rezultatet përfundimtare të zgjedhjeve të parakohshme parlamentare të 15 korrikut. Në bazë të rezultateve të lexuara nga kryetari i KSHZ- së, Oliver Derkovski, LSDM ka fituar 46 ulëse në Kuvend, VMRO DPMNE- 44, BDI- 15, Koalicioni Aleanca me Alternativën- 12, E Majta- 2 dhe PDSH- 1 ulëse. Kuvendi i Maqedonisë së Veriut numëron 120 deputetë. Gjatë këtij mandati katërvjeçar, shqiptarët do të përfaqësohen me gjithsej 32 deputetë nëpër parti dhe koalicione të ndryshme.
Rezultati i ngushtë i prodhuar nga zgjedhjet e parakohshme parlamentare në Maqedoninë e Veriut mes oponentëve politikë maqedonas dhe shqiptarë, krijon mundësi që të kryhet mirë roli i një korrektuesi të politikave të qeverisë, sipas ekspertëve të çështjeve politike. Vetëm dy deputetë është dallimi mes koalicionit të udhëhequr nga LSDM- ja dhe koalicionit të drejtuar nga VMRO- DPMNE- ja. Edhe te blloku politik shqiptar, pothuajse ka rezultat të balancuar, me një dallim prej 3 deputetësh. Bashkimi Demokratik për Integrim është i përfaqësuar me 15 deputetë dhe Koalicioni Aleanca për Shqiptarët me Alternativën ka siguruar 12 deputetë.
Shpallja e rezultateve nga KSHZ i hap rrugën konstituimit të përbërjes së re parlamentare, në të cilën do të zgjidhet edhe kryetari i ri i Kuvendit. Në bazë të Kushtetutës, Presidenti i shtetit, Stevo Pendarovski, mandatin për formimin e qeverisë së re do t’ia japë liderit të partisë apo subjektit politik që siguron shumicën parlamentare për formimin e qeverisë. Në garë për marrjen e mandatit janë LSDM- ja si parti e parë, por edhe VMRO- ja, e cila ka dy ulëse më pak në Kuvend, por që ka thënë se tani ka nisur konsultimet me partitë e tjera për sigurimin e numrave në Kuvend. Nga VMRO- ja nuk ka dhënë detaje duke theksuar se kryetari i partisë, Hristijan Mickovski, është i autorizuar nga organet partiake për udhëheqjen e negociatave. Kryetari i LSDM- së, Zoran Zaev, ka bërë të ditur se bisedimet për qeverinë e re do t’i nisë pas Festës Kombëtare të 2 Gushtit, por në fakt tashmë bisedimet kanë nisur. Bashkimi Demokratik për Integrim në zgjedhje mori pjesë me moton “koha për Kryeministrin e parë shqiptar”, por zyrtarë të tij tani pas zgjedhjeve kanë theksuar se prioritet për këtë parti në negociatat për formimin e qeverisë së re do të jenë zbatimi i tri marrëveshjeve: asaj me Greqinë për emrin, me Bullgarinë për fqinjësi të mira dhe Marrëveshja e Ohrit.