Balla: Pa u votuar ndryshimet kushtetuese, listat s’hapen 100%
“Kodin e Praktikave të Mira të ‘ Venecias’ Luli e lexon sipas qejfit”
Kreu i Grupit Parlamentar të Partisë Socialiste, Taulant Balla, e ripërsëriti qëndrimin e maxhorancës për t’i shkuar deri në fund nismës për të miratuar ndryshimet kushtetuese seancën e sotme.
Në fjalën e mbajtur në Parlament, Taulant Balla theksoi se nëse Kuvendi nuk i miraton sot ndryshimet kushtetuese, nuk do të jetë e mundur që të hapen listat në masën 100 për qind ashtu siç ka kërkuar Partia Demokratike. Ai shtoi më tej se PD- ja nuk është e sinqertë kur thotë se nuk ka kohë, pasi nëse një gjë e tillë do të ishte e vërtetë, nuk do të kishte pasur kohë as për ndryshimet e “5 qershorit”. Sipas tij, e gjithë kjo histori që po krijon opozita jashtë Kuvendit është e njëjta me çfarë ka ndodhur më herët dhe qëllimi është i qartë: për të prodhuar bllokim. “Meqenëse nesër kemi një çështje të rëndësishme, doja të thosha që t’i jepja një përgjigje PD- së, e cila thotë që ne nuk duam që ju të votoni ndryshimet kushtetuese, se duam t’i hapim listat 100%! Po si hapen listat 100% për zgjedhjet e ardhshme, pa u votuar ndryshimet kushtetuese nesër? Këtë Luli nuk e thotë, ndërkohë që thotë se paskemi shkelur afatet e Kodit të Praktikave të Mira të Komisionit të Venecias që nuk këshillon ndryshime 1 vit para zgjedhjeve! Po edhe Kodin e Praktikave të Mira Luli e lexon sipas qejfit, sepse po t’i qëndrojmë strikt leximit, atëherë ne s’duhet ta votonim as marrëveshjen e 5 qershorit, se edhe ajo i bie më pak se 1 vit para zgjedhjeve të ardhshme. Domethënë sipas Lulit, ne sot jemi vonë për hapjen e listave, prandaj duhet t’i shtyjmë që të jemi më herët kur të bjerë dakord Luli! Opozitë ka dhe këtu dhe monopolin e saj se merr askush. Kuvendi duhet të hapë listat, dhe nesër, pa pritur që Luli të bie dakord, edhe pse shpresoj që kjo ditë të jetë dita kur të bien dakord”, tha Balla dje në Kuvend.
Doja që t’i jepja një përgjigje PD- së, e cila thotë që ne nuk duam që ju të votoni ndryshimet kushtetuese, se duam t’i hapim listat 100%! Po si hapen listat 100% për zgjedhjet e ardhshme, pa u votuar ndryshimet kushtetuese nesër?