Ballkani Perëndimor avancon lëvizjen e lirë të njerëzve dhe mallrave
Rama përmend “Shengenin e Ballkanit Perëndimor”: Mos e politizoni, nxit bashkëpunimin ekonomik rajonal
Udhëheqësit e Ballkanit Perëndimor ranë dakord për avancimin e lëvizjes së lirë të mallrave, shërbimeve, kapitalit dhe njerëzve, si dhe për të punuar në identifikimin e projekteve të investimeve, në mënyrë që fondet për rimëkëmbjen dhe investimet e ardhshme të mund të ndahen në mënyrë efikase dhe të shpejtë.
Ata premtuan se do të përcjellin edhe zbatimin e këtyre masave, pas diskutimeve në një samit online, të organizuar nga Këshilli Atlantik, kushtuar hapave konkretë për përmirësimin e bashkëpunimit ekonomik rajonal dhe tërheqjen e investimeve të huaja. Këshilli Atlantik është një qendër e politikës së jashtme, me bazë në Uashington të Shteteve të Bashkuara të Amerikës. Udhëheqësit e gjashtë vendeve të Ballkanit Perëndimor janë pajtuar për veprime “të guximshme e praktike për të ndihmuar rajonin që të dalë më i fortë nga ndikimi i COVID- 19, me mundësi më të mëdha të zhvillimit ekonomik”. Në samit morën pjesë: Kryeministri i Shqipërisë, Edi Rama; Kryeministri i Kosovës, Avdullah Hoti; Presidenti i Serbisë, Aleksandar Vuçiç; Presidenti i Maqedonisë së Veriut, Stevo Pendarovski; Kryetari i Këshillit të Ministrave të Bosnjës dhe Hercegovinës, Zoran Tegeltija; dhe ministrja e Ekonomisë së Malit të Zi, Dragica Sekulliç. Samiti ishte pjesërisht i hapur për publikun.
Jim O’Brian, nga Këshilli Atlantik, konfirmoi se gjashtë liderët e mbështetën planin ambicioz, “gjë që publikisht nuk ka ndodhur disa muaj”. Sipas tij, ata u zotuan se do t’i mbështesin edhe marrëveshjet dypalëshe rajonale. Gjithashtu, secili shtet premtoi se do t’i identifikojë projektet afatgjata të investimeve në infrastrukturë.
Damon Wilson, nënkryetar i Këshillit Atlantik, tha në hapje të video- samitit se kohët e vështira kërkojnë vendime të vështira dhe se është e rëndësishme që liderët të punojnë së bashku, për të krijuar një treg të përbashkët në të mirë të qytetarëve. Në fund Wilson vlerësoi faktin se takimi i së mërkurës dëshmoi angazhimin transatlantik rreth rajonit të Ballkanit Perëndimor.
RAMA KËRKON BASHKËPUNIM
Kryeministri i Shqipërisë, Edi Rama, tha se si pasojë e pandemisë së koronavirusit, ekonomia e rajonit është prekur rëndë, dhe sipas tij, duhet një plan praktik për integrimin ekonomik. “Besoj fuqishëm që pandemia na ka dhënë prova nëse ishte e nevojshme ajo që ne po provojmë të bëjmë që gjashtë vjet, që nga koha kur filloi procesi i Berlinit, është saktësisht çfarë iu duhet gjeneratave të reja të rajonit tonë”, deklaroi Rama. Ai përmendi nismën për “Shengenin e Ballkanit Perëndimor”, që do të ndikonte në nxitjen e bashkëpunimit ekonomik rajonal, ndërsa bëri thirrje që ideja të mos politizohet, pasi nuk paraqesin zëvendësim për proceset integruese të rajonit.
VUÇIÇ: S’JAM OPTIMIST PËR ZGJIDHJEN ME KOSOVËN
Duke folur për mundësitë që prodhon bashkëpunimi ekonomik mes vendeve të rajonit, Presidenti i Serbisë, Aleksandar Vuçiç, tha se ekzistojnë një mori pengesash, të cilat do të mund të hiqeshin. Ai përmendi procedurat e shumta doganore që ekzistojnë në mes të vendeve të rajonit. Sipas Vuçiç, ekzistojnë mosmarrëveshje mes vendeve të rajonit edhe të natyrës politike, duke përmendur në veçanti dallimet me Kosovën. “Nuk është faji i Avdullah Hotit apo imi... Ne duhet që, të paktën, të provojmë të bëjmë më mirë për ta zgjidhur këtë çështje, edhe pse nuk jam krejtësisht optimist për këtë dhe natyrisht se janë disa çështje të tjera mes nesh, po ashtu brenda Bosnje e Hercegovinës”, tha Vuçiç. Presidenti i Serbisë e cilësoi të një rëndësie të veçantë bashkëpunimin rajonal ekonomik, pasi, sipas tij, “edhe nëse ne i bashkohemi BE- së përpara disa shteteve, ne do të mbesim në rajon dhe bashkëpunimi mes nesh, brenda gjashtë shteteve të Ballkanit Perëndimor do të mbetet prioritet kryesor i Serbisë”.
HOTI PËRMEND FRAGMENTIMIN
Kryeministri i Kosovës, Avdullah Hoti, u shpreh se rajoni është i fragmentuar ekonomikisht dhe se, pavarësisht përpjekjeve për të rritur bashkëpunimin rajonal, ka ende pengesa të shumta. “Ende ka shumë barriera sa i takon burokracisë. Legjislacioni ndoshta… Ne ende nuk kemi lidhje të plota infrastrukturore mes shteteve tona”, deklaroi Hoti. Ai tha se bashkëpunimi rajonal duhet të shfrytëzohet për t’i larguar të gjitha barrierat që ekzistojnë mes vendeve të Ballkanit Perëndimor.