Hyseni: Marrëveshja gjithëpërfshirëse doemos do rezultojë me njohje reciproke
Sot në Bruksel mbahet një tjetër raund në nivel teknik mes Kosovës dhe Serbisë, ku do të marrin pjesë Koordinatori i Kosovës për Dialogun, Skënder Hyseni, përfaqësuesi i Serbisë, Marko Gjuriç, dhe Emisari i BE- së për dialogun, Miroslav Lajçak. Koordinatori Hyseni tha se në negociata “do të preken elemente të veçanta të një marrëveshjeje gjithëpërfshirëse – ligjërisht, ndërkombëtarisht obliguese. Janë negociata skajshmërisht politike për një marrëveshje gjithëpërfshirëse, e cila doemos do të rezultojë me njohje reciproke. Ajo që është esenciale, është ndërtimi i një konsensusi maksimal në mënyrë që këto punë t’i çojmë në drejtimin e duhur”, tha Hyseni në “Klan Kosova”.
Ndërkohë, zëdhënësi i BE- së, Peter Stano, e ka përgënjeshtruar raportimin e sotëm të medias serbe “Novosti”, se ka një ultimatum që Brukseli po përgatit për Serbinë me qëllim të njohjes së pavarësisë së Kosovës dhe lejimit të anëtarësimit në OKB. “Në parim, ne nuk komentojmë sa u përket spekulimeve të mediave, por sa i përket këtij rasti, dua që në mënyrë eksplicite të demantoj spekulimet për takimin e nesërm të nivelit të ekspertëve”, ka thënë Stano për REL. Media të afërta me pushtetin në Serbi të mërkurën kanë raportuar se Bashkimi Europian është duke përgatitur një ultimatum për Serbinë, ku gjatë kësaj të enjteje do të kërkojnë nga Beogradi zyrtar që të njohë pavarësinë e Republikës së Kosovës, dhe që Serbia të lejojë anëtarësimin e Kosovës në Organizatën e Kombeve të Bashkuara. Sipas tekstit, drafti është punuar pa e parë as Kosova e Serbia, dhe se për këtë janë keqpërdorur takimet e Brukselit.