Ndërkombëtarët: Na vjen keq që s’pati konsensus
Soreca: “Për të ardhur keq që s’u gjet kompromis në Këshillin Politik”. SHBA: “Do shohim nëse drejtuesit do ta mbajnë fjalën e tyre”
Reagimet e faktorit ndërkombëtar pas votimin në Kuvend për Kushtetutën e re ishin të menjëhershme dhe të njëpasnjëshme.
Nga Bashkimi Europian deri te SHBA- ja, qëndrimi ishte thuajse i njëjtë, ku theksi vihej në keqardhjen për mungesën e konsensusit. Bashkimi Europian reagoi përmes zëdhënëses së Komisionit Europian, Ana Pisonero, deklarata e së cilës u ripublikua nga ambasadori i BE- së në vendin tonë, Luigi Soreca. BASHKIMI EUROPIAN Në reagimin e zyrtarëve të lartë të Bashkimit Europian vihej theksi te rëndësia që ka tashmë kërkimi i dialogut për hapat pasues të këtij votimi, ku dialogu dhe gjithëpërfshirja duhet të jenë në qendër të fokusit. “Ndërsa pranojmë miratimin nga Parlamenti i Shqipërisë të disa ndryshimeve në Kushtetutë në lidhje me sistemin zgjedhor, është për të ardhur keq që nuk është gjetur më shumë kohë në fazën përgatitore për të arritur një kompromis me të gjitha partitë në Këshillin Politik. Ndryshimet në Kodin Zgjedhor të miratuara nga Parlamenti më 23 korrik për të zbatuar marrëveshjen e 5 qershorit, bazuar në rekomandimet e OSBE/ ODIHR- it, kanë përmbushur kushtin e vendosur nga Këshilli Europian kur vendosi për hapjen negociatave në mars. Tani është thelbësore që ndryshimet në Kodin Zgjedhor për të zbatuar ndryshimet kushtetuese, në veçanti listat e hapura dhe roli i koalicioneve parazgjedhore, të diskutohen siç duhet me të gjithë aktorët politikë në Këshillin Politik në një mënyrë bashkëpunuese dhe gjithëpërfshirëse përpara se të votohen”, thuhej në reagimin e
Bashkimit Europian për ndryshimin e Kushtetutës që u bë dje në Kuvend. AMBASADA E SHBA Po ashtu, edhe selia diplomatike e SHBA- së në vendin tonë nuk ishte e kënaqur me mungesën e konsensusit në votimin e bërë në Kuvend dje, teksa theksoi se do duhej të ishte ndjekur shembulli i marrëveshjes së 5 qershorit. Po ashtu, në deklaratë theksohet se do të ndiqet me vëmendje nëse drejtuesit politik do ta mbajnë fjalën e tyre për gjërat për të cilat janë angazhuar. “Më 23 korrik Parlamenti miratoi legjislacionin për të kodifikuar marrëveshjen e 5 qershorit për Reformën Zgjedhore, e cila u arrit në një mënyrë transparente dhe gjithëpërfshirëse përmes Këshillit Politik. Sot, Parlamenti miratoi ndryshime në
Kushtetutë që do të mundësojnë masa shtesë për Reformën Zgjedhore. Ndërsa ky veprim ishte në kompetencën e Parlamentit, është për të ardhur keq që nuk u mor në të njëjtën frymë me të cilën u arrit marrëveshja e 5 qershorit. Ne i kujtojmë shumicës deklaratat e saj se me gjithë miratimin e sotëm në Parlament, ata synojnë të angazhohen me të gjithë partitë në Këshillin
Politik, në mirëbesim dhe me qëllimin për të arritur në marrëveshje për zbatimin e legjislacionit mbi listat e hapura dhe koalicionet. Ne e kuptojmë zhgënjimin e opozitës së bashkuar, ndërsa mirëpresim vendosmërinë e tyre për të mbetur të angazhuar në institucione dhe procese demokratike, përfshirë Këshillin Politik, në mënyrë që të dëgjohen zërat e të gjithë shqiptarëve.
Përsërisim, se ne do të shohim nëse drejtuesit do ta mbajnë fjalën e tyre. Ashtu siç vepruan në arritjen e marrëveshjes së 5 qershorit, udhëheqësit shqiptarë duhet të tregojnë gatishmërinë dhe aftësinë e tyre për të negociuar marrëveshje që vënë në radhë të parë interesat më të mira të popullit shqiptar”, thuhet në deklaratën e ambasadës së SHBA- së.