Gjermania dhe Anglia, apel për dialog pas votimit në Kuvend
Reagime të forta pas votimit për ndryshimet e Kushtetutës erdhën edhe nga selitë diplomatike të Anglisë dhe Gjermanisë në vendin tonë. Peter Zingraf dhe Duncan Norman ishin thuajse në sinkron sa i përket keqardhjes për dështimin e gjetjes së konsensuesit për ndryshimet në Kushtetutë, dhe shtyjnë palët që të kërkojnë një marrëveshje në vijim. AMBASADORI
GJERMAN “Shpreh keqardhjen që me gjithë marrëveshjen e arritur dhe tanimë të vendosur në ligj të 5 qershorit, Reforma Zgjedhore, e nisur në mënyrë të suksesshme, është duke marrë sërish tipare konfliktuale përmes ndryshimeve kushtetuese. Unë respektoj rolin institucional të Parlamentit, por njëkohësisht kuptoj që prej marrëveshjes së 5 qershorit rezultojnë pretendime legjitime për një dialog gjithëpërfshirës. Ndaj u bëj thirrje të gjithë aktorëve të bashkëpunojnë për implementimin ligjor të ndryshimeve kushtetuese në Kodin Zgjedhor, si dhe të respektojnë marrëveshjen e 5 qershorit. Në këtë kontekst duhet të diskutohen në mënyrë të veçantë çështjet e listave të hapura dhe roli i koalicioneve parazgjedhore me të gjithë aktorët politikë në Këshillin Politik, në frymën e përfshirjes dhe të bashkëpunimit. Sjell në vëmendje që Reforma Zgjedhore mbetet një element qendror në përmbushjen e kushteve të formuluara nga Këshilli i BE- së ( dhe në mënyrë të ngjashme nga Bundestag- u) përpara Konferencës së Parë të Anëtarësimit me BE- në dhe se zbatimi i suksesshëm i saj është një prej kushteve të grupit të dytë”. AMBASADORI ANGLEZ
“Është thelbësore që ndryshimet e ardhshme në Kodin
Zgjedhor të diskutohen plotësisht me të gjithë aktorët politikë në Këshillin Politik përpara se të dërgohen për votim në Parlament. Marrëveshja e 5 qershorit tregoi se çfarë mund të arrihet me dialog, kohë dhe vullnet politik. Do të donim të kishim parë të njëjtën qasje konstruktive të treguar edhe sot në miratimin e ndryshimeve në Kushtetutë”.