Ndryshimet kushtetuese, Meta: Grusht shteti, përgjigje nga qytetarët

Përplasja e re, kreu i shtetit: “Presidenti do mbrojë Kushtetutën”. Rama: “Nuk e ndalon dot Kushtetutën të jetë detyruese për ty”

Ndryshimet kushtetuese në Parlament pa dakordësinë e opozitës së bashkuar duket se do të jenë motivi i ri për përplasjen e radhës mes kreut të shtetit, Ilir Meta, dhe kreut të qeverisë, Edi Rama.

Presidenti Ilir meta reagoi dje pas miratimit në Parlament të ndryshimeve duke i quajtur të papranueshme. Madje, Presidenti u shpreh se akti i miratimit të tyre është një grusht shteti. Por pasi u miratuan në Parlament, drafti i ndryshimeve kushtetuese pritet të shkoj në Presidencë për t’u dekretuar. Në këtë kuadër, Meta paralajmëroi se nuk do t’i shpallë ligjet, por do t’i kthejë për rishqyrtim. Në postimin e tij në “Facebook”, Presidenti shkroi se ai do të respektojë gjithmonë Kushtetutën, ndërkohë nuk kurseu akuzat ndaj kreut të qeverisë, Edi Rama, se ka shkelur marrëveshjen e 5 qershorit dhe besimin e ndërkombëtarëve.

ILIR META “Akti i sotëm i ndryshimit të njëanshëm dhe me urgjencë të pajustifikueshme të Kushtetutës nga Kuvendi me legjitimitet të cunguar, është antikushtetues dhe i papranueshëm! Ndryshimi i dhunshëm i Kushtetutës asgjësoi marrëveshjet konsensuale të 14 janarit dhe të 5 qershorit, që mundësuan një proces dhe produkt gjithëpërfshirës, duke hedhur përsëri në erë mirëbesimin ndërmjet palëve, paqen sociale në vend dhe procesin e integrimit europian të Shqipërisë. Retorikat oportuniste dhe hipokrite të disa ndërkombëtarëve shkojnë kundër aspiratës dhe projektit strategjik të shqiptarëve për të ndërtuar një të ardhme europiane. Asnjë bandë pengmarrëse s’do të mund t’i shpëtojë përgjigjes së merituar që do të marrë nga forca e qytetarëve të bashkuar kundër këtij grushti shteti. Presidenti i Republikës si gjithmonë do të jetë në krye të detyrës në mbrojtje të Kushtetutës, të të drejtave të patjetërsueshme dhe vullnetit të qytetarëve për të marrë në dorë fatet e tyre. Edi Rama e ftoi sot popullin shqiptar në një përballje historike. Ai u mburr sot se është djali i komunistit që vari në mes të Kukësit poetët për fjalën e lirë. Ne, shqiptarët, do t’i përgjigjemi shqiptarisht deri në fund”. KUNDËRPËRGJIGJJA Përmes rrjeteve sociale erdhi edhe kundërpërgjigjja e Kryeministrit Rama. Në postimin e tij në “Twitter”, Rama i kujton kreut të shtetit që maxhoranca nuk e shkarkoi ndonëse shkeli Kushtetutën më shumë se një vit më parë. Ndërkohë e akuzon se po vepron njësoj si Haxhi qamili duke sulmuar ndërkombëtarët.

EDI RAMA “Ilir, ti je një shkelës recidiv i Kushtetutës sipas Venecias, por po sipas Venecias, e ke shkelur, po jo aq rëndë Kushtetutën sa për t’u shkarkuar! Dhe ne që shkeljet e tua i mbajtëm në kurriz, respektuam Venecian e s’të shkarkuam, sepse jemi të përgjegjshëm në përfaqësimin e vendit! Por siç nuk i ndalove dot zgjedhjet vendore dhe siç nuk e fute dot në zjarr Shqipërinë dje, nuk ke asnjë shans ta ndalosh Kushtetutën e Shqipërisë të jetë detyruese edhe për ty, ashtu sikundër s’ke asnjë shans të ndezësh zjarrin e ëndërruar të konfliktit të popullit me shtetin! Prandaj, boll u bëre dhe na bëre të gjithëve qesharakë si shtet, duke e përdorur zyrën e Presidentit si llogore lufte politike, duke sharë ambasadorët siç bënte Haxhi Qamili e duke i folur vetes në vetë të tretë si Luigji XIV! Boll se s’të ka askush asnjë borxh, jo më Shqipëria!”. Më tej Kryeministri Rama mori reagim institucional. Zëdhënësi i Presidencës, Tedi Blushi, reagoi në “Twitter”, ku i kujton kreut të qeverisë se Presidenti nuk ngatërron ndërkombëtarët me lobistët. “I sëmuri i Surrelit kujton se ndërkombëtarët janë frekuentuesit e dyshimtë të “China Club” në Berlin apo lobistët e sivëllait të tij që kërkojnë copëtimin dhe zhbërjen e shtetit të Kosovës. Çfarë mjerimi! Këlyshi i Dobriça Qosiçit të mos provokojë më tej shqiptarët se do të mbetet një kujtim nga e kaluara!”, shkroi Blushi në dy postimet e njëpasnjëshme në “Facebook”.