Çfarë kuptimi kanë mesazhet e koduara të Metës për Ramën në rrjetet sociale
Pas votimit në Kuvend për të ndryshuar Kushtetutën, reagimi i Presidentit Meta ishte shumë i ashpër, teksa shkroi se me këtë veprim Kryeministri Rama kishte bërë që qytetarët shqiptarë të dalin në shesh. Por përtej reagimit dhe deklaratës së Presidentit, nuk ishte më i butë edhe këshilltari i Metës, Tedi Blushi. Ky i fundit përmes dy postimeve të njëpasnjëshme shkroi me tone të forta lakonizmi kundrejt Kryeministrit Rama në lidhje me dy ngjarje në historinë e politikës shqiptare, por edhe asaj të rajonit. Postimi i parë i Blushit, ku shkruhej: “I sëmuri i Surrelit kujton se ndërkombëtarët janë frekuentuesit e dyshimtë të “China Club” në Berlin apo lobistët e sivëllait të tij që kërkojnë copëtimin dhe zhbërjen e shtetit të Kosovës. Çfarë mjerimi!”, lidhet me një histori të para dy viteve. Mediat gjermane shkruan për një darkë të refuzuar në një restorant të shtrenjtë në gjermani nga deputetët e Bundestag- ut, ku ishin ftuar nga Kryeministri Shqiptar, Edi Rama. Ndërsa në postimin e dytë, insinuata e ngritur nga këshilltari i Presidentit ishte akoma dhe më e rëndë, pasi shkruante: “Këlyshi i Dobriça Kosiçit të mos provokojë më tej shqiptarët se do të mbetet një kujtim nga e kaluara!”. Dobriça Kosiç është një personazh shumë i njohur në Ballkanin e viteve 80’, 90’. Ka qenë President dhe Kryeministër i Jugosllavisë. Ai është cilësuar si një nga njerëzit më influentë të kohës pas Titos në Jugosllavi, dhe është shumë i kritikuar për mbështetjen që ka dhënë për dy kriminelët e luftës: Sllobodan Milosheviçin dhe Radovan Karaxhiçin.