KLP emëron drejtuesen e BKH, Aida Hajnaj

Nëntë anëtarë të Këshillit të Lartë në Prokurori votuan pro Hajnajt

Këshilli i Lartë i Prokurorisë ka emëruar unanimisht drejtuesen e Byrosë Kombëtare të Hetimit, Aida Hajnaj. Hajnaj është votuar pro nga 9 anëtarë. Ajo u propozua që të merrte drejtimin e BKH nga SPAK pas skualifikimit të tre rivalëve të mbetur në garë. Kujtojmë se BKH është konsideruar ndryshe edhe si “FBI- ja” shqiptare. Pak ditë më parë, Struktura e Posaçme kundër Korrupsionit dhe Krimit të Organizuar propozoi Aida Hajnajn për kryetare të BKH- së. Në një njoftim zyrtar, SPAK tha se Aida Hajnaj ishte e vetmja që i ka plotësuar kriteret për të drejtuar Byronë Kombëtare të Hetimit. Kandidatët e tjerë për kreun e “FBI- së” shqiptare, Artur Beu, Ervin Hodaj dhe Idajet Faskaj, nuk i kanë plotësuar kriteret. Personi në krye të BKH- së do të drejtojë ekipet e hetuesve, pasi të jenë zgjedhur për këtë mision. Atyre do t’u monitorohen llogaritë bankare dhe telefonat përgjatë gjithë kohës, për t’u siguruar se do ta zbatojnë detyrën me integritet dhe paanshmëri. Zgjedhja e kreut të BKH- së kaloi nëpërmjet një procesi ku u përdor edhe makina e së vërtetës dhe gara të tjera fizike dhe mendore, proces ky që u monitorua nga amerikanët dhe partnerët europianë. BKH është një institucion, i cili do të ndihmojë SPAK- un në hetimin e rasteve të korrupsionit në nivele të larta. BKH do të përbëhet nga një drejtor dhe një ekip hetuesish, të cilët duhet të përmbushin standarde të forta, të ngjashme me ato të FBI- së amerikane. KUSH ISHIN 4 PRETENDENTËT PËR DREJTUES Komisioni i Përzgjedhjes për kreun e Byrosë Kombëtare të Hetimit kaloi në muajin shkurt të këtij viti në fazën përfundimtare 4 nga 8 pretendentët që u intervistuan për drejtimin e BKH- së. Sipas këtij Komisioni, kandidatët Aida Veizaj, Artur Beu, Ervin Hodaj dhe Idajet Faskaj kishin arritur nivelin më të lartë gjatë testeve të kryera. Procesi i përzgjedhjes është monitoruar nga misione të Bashkimit Europian dhe qeverisë së SHBA- së. Të katër pretendentët që u afruan më pranë drejtimit të Byrosë Kombëtare të Hetimit vinin nga radhët e Policisë së Shtetit, me karrierë të gjatë dhe në role drejtuese. I vetmi prokuror që ishte në këtë garë, u përjashtua pas intervistave të kryera në datat 26 dhe 27 shkurt.