Italia i kthen “borxhin” Shqipërisë, dërgon ekip mjekësh e infermierësh
Nuk vonoi gjatë. Italia i ka kthyer “borxhin” Shqipërisë duke dërguar një ekip mjekësh dhe infermierësh, të cilët do të asistojnë në dy spitalet COVID.
“Kur disa muaj më parë iu gjendëm pranë Italisë mike në një moment tejet të vështirë, nuk e kishim menduar se do të na e kthenit ndihmën kaq shpejt. Ishte një gjest solidar që erdhi natyrshëm dhe jam shumë e kënaqur që sot na gjendeni pranë në një moment të vështirë për ne, ku eksperienca që ju keni fituar do të jetë mjaft e vlefshme për ne dhe për sistemin tonë shëndetësor. Kjo pandemi na ka mësuar se lufta nuk fitohet i vetëm, por vetëm me solidaritet mes vendeve”, tha ministrja e Shëndetësisë, Ogerta Manastirliu, e cila së bashku me ambasadorin e Italisë në vendin tonë, Fabrizio Buçi, pritën dje në Aeroportin “Nënë Tereza” delegacionin italian. Ambasadori i Italisë në Shqipëri deklaroi se ky është një gjest për një vend mik, i cili iu gjend pranë Italisë në një moment shumë të vështirë. “Qeveria italiane është shumë e lumtur që po ndihmon Shqipërinë, pas gjestit të madh që bëri Shqipëria për Italinë në muajin mars. Edhe Italia nuk i harron miqtë në nevojë”, tha ambasadori italian. Task- forca e Emergjencave Civile italiane, e përbërë nga shtatë ekspertë, do të zhvillojë një veprimtari dypalëshe për një periudhë 14ditore. Grupi i ekspertëve do të zhvillojë veprimtari konsulence për çështje që kanë të bëjnë me aspektin shëndetësor specifik në diagnostikimin dhe luftën ndaj koronavirusit. Grupi përbëhet nga një mjek urgjence, një anestezist dhe nga një funksionar i Emergjencave Civile të Qarkut të Puglia- s, nga një mjek dhe një infermier urgjence i Qarkut të Lombardisë, një mjek infeksionist i Qarkut të Lazio- s dhe nga një infermiere urgjence e Qarkut të Piemontes, e cila është nga Shqipëria. Krahas grupit të mjekëve dhe të infermierëve, në Aeroportin e Rinasit ka mbërritur edhe një sasi prej 500.000 maskash kirurgjikale në ndihmë të vendit tonë.