Zgjedhjet, Vokshi: Fituesit, të paracaktuar nga Edi Rama

Ish- deputetja e Partisë Demokratike, Albana Vokshi, e cilësoi një farsë procesin e zgjedhjeve të mbajtur dje në 12 universitete publike të vendit. Përmes një statusi në rrjetet sociale, Vokshi thotë se fituesit ishin të paracaktuar. “Njësoj si zgjedhjet politike të 30 qershorit vjet, zgjedhjet në universitetet sot ishin të paracaktuara, pa garë, me shumicën e studentëve të përjashtuar nga zgjedhjet me vendim qeverie. Fituesit ishin të paracaktuar. U zhvillua e njëjta skemë si në zgjedhjet lokale, u bë i njëjti shantazh dhe presion ndaj studentëve e ndaj pedagogëve. U përdor e njëjta infrastrukturë partiake, edhe kutitë e votimit ishin më logo të PSsë, gjë që ndalohet kategorikisht nga ligji i arsimit të lartë. Pa fushatë, pa garë, pa ide, pa programe, pa alternative dhe me kandidatë të paracaktuar nga Edi Rama dhe Partia shtet”, ka shkruar Vokshi. Sipas saj, drejtuesit e universiteteve për të garantuar pjesëmarrje të lartë të studentëve në votime, caktuan 30 korrikun edhe si datë provimesh. Vokshi ka denoncuar po ashtu edhe mos respektimin e masave anti- COVID. “Kandidatët për rektorë, dekanë, anëtarë të KIZ- it ilegjitim, qëllimshëm caktuan datat e provimeve sot, për të rritur pjesëmarrjen e studentëve, duke rrezikuar shëndetin e tyre, me qëllimin e vetëm uzurpimi dhe pushteti. Aktet ligjore ndalojnë turma të tilla, por kur ligji shkelet në emër të Ramës, institucionet ligjzbatuese mbyllin sytë, sepse jeta e studentëve dhe e pedagogëve nuk ka asnjë rëndësi për Edi Ramën përpara qëllimit të tij për të uzurpuar universitetet”, ka vënë në dukje ish- deputetja e Partisë Demokratike, Albana Vokshi.