Bruksel, deklarata ndryshe nga Kosova e Serbia për bisedimet
Hyseni: “Pakti do përfundojë me njohje”. Gjuriç: “Nuk do ta keni!”
Bisedimet në nivel ekspertësh mes Kosovës dhe Serbisë, të mbajtura të enjten në Bruksel, kanë zgjatur shtatë orë dhe "ishin të vështira".
Ky ishte takimi i dytë brenda një jave, në nivel ekspertësh, mes Kosovës dhe Serbisë, me ndërmjetësimin e të dërguarit të Bashkimit Europian për këtë proces, Mirosllav Lajçak. Kosova është përfaqësuar nga Koordinatori për dialogun, Skënder Hyseni, ndërsa Serbia nga drejtori i Zyrës për Kosovës në Qeverinë e Serbisë, Marko Gjuriç. Hyseni ka thënë se me palën serbe është duke u negociuar një marrëveshje e përgjithshme. "Po negociojmë elemente të një marrëveshjeje të përgjithshme, e cila në fund do të jetë marrëveshje ligjërisht e obligueshme ndërkombëtarisht dhe që patjetër duhet të rezultojë me normalizim të plotë të marrëdhënieve Kosovë - Serbi, që nënkupton pashmangshëm njohje reciproke, njohje të ndërsjellë". Ai pohoi se "Bisedimet janë të vështira, nuk janë të lehta dhe unë nuk jam nga ana që pres që gjithçka të arrihet lehtë, mirëpo jam optimist që mbështetur në tonin e bisedave deri tash, po ecim në drejtimin e duhur. Ende është shumë herët të shfaqim çfarëdo optimizmi", ka deklaruar Hyseni. Ai tha se ajo që po hidhet në letër, kapitujt dhe elemente të shkruara koncize, bazohen në provizione të qarta të së drejtës ndërkombëtare, por nuk pranoi të japë detaje, pasi, sipas tij, "kjo vetëm mund të krijojë obstruksion në procesin, i cili në fund duhet pashmangshëm të përfundojë me marrëveshje gjithëpërfshirëse, ligjërisht të obligueshme, që do të rezultojë me njohjen reciproke dhe normalizimin e marrëdhënieve. Nëse ky nuk do të jetë fundi, nuk do të ketë marrëveshje për asgjë. Ose për çdo gjë, ose për asgjë". Hyseni theksoi se "me palën serbe është duke u negociuar një marrëveshje gjithëpërfshirëse". Edhe Gjuriç tha të enjten se zhvilluan bisedime shumë të vështira për kthimin e personave të zhvendosur dhe pozitën e tyre. Gjuriç ka shtuar se tema e dytë e bisedimeve ishte bashkëpunimi ekonomik. "Pozita jonë lidhur me këtë çështje është shumë e qartë - ne mendojmë se duhet të liberalizojmë lëvizjen e mallrave, shërbimeve kapitalit dhe njerëzve dhe se është e nevojshme të definohen projektet kyçe infrastrukturore, të cilat duhet të realizohen për t'i përshpejtuar këto lëvizje, siç janë autostrada, hekurudhat". Përfaqësuesi i Serbisë deklaroi se i kishte thënë Hysenit se ishte "lodhur duke dëgjuar gënjeshtra për negociatat për pavarësinë e Kosovës dhe një marrëveshje që do të rezultojë në atë që ju ëndërroni. Nuk do të rezultojë me këtë. Por mund të rezultojë në normalizimin e marrëdhënieve, tregtisë mes njerëzve, shkollimin normal, qarkullimin e trafikut, rritjen ekonomike nga të dyja palët. Nëse jeni gati për diçka të tillë, Serbia është gjithmonë e gatshme për diçka të tillë. Por mos i prishni bisedimet duke paraqitur të pavërteta në lidhje me ato që diskutohen".