Trump kërkon shtyrjen e zgjedhjeve të nëntorit, republikanët kundër
Presidenti i SHBA- ve, Donald Trump, ka sugjeruar që zgjedhjet presidenciale të nëntorit të shtyhen, duke thënë se rritja e votimit postar mund të çojë në mashtrim dhe rezultate të pasakta. Ai hodhi idenë e një vonese në votim, që njerëzit të mund të "votojnë siç duhet, të sigurt". Shtetet amerikane dëshirojnë ta bëjnë votimin presidencial të nëntorit me postë, për shkak të shqetësimeve të shëndetit publik mbi pandeminë e koronavirusit. Sipas Kushtetutës amerikane, Presidenti nuk e ka autoritetin të shtyjë vetë zgjedhjet. Çdo vonesë do të duhej të aprovohej nga Kongresi. Por edhe një numër i madh i republikanëve të Kongresit, duke përfshirë anëtarët e udhëheqjes së Dhomës dhe Senatit, kundërshtuan haptas sugjerimin e Presidentit Donald Trump të enjten, që zgjedhjet presidenciale të nëntorit duhet të vonohen. Kryetari i Komisionit Juridik të Senatit, republikani Lindsey Graham, aleat i Trump, tha për CNN në lidhje me thirrjen e Presidentit për të vonuar zgjedhjet se, "Nuk mendoj se kjo është një ide veçanërisht e mirë". Senatori John Thune, një anëtar i udhëheqjes republikane, i tha CNN se do të ketë zgjedhje në nëntor përkundër mesazheve në "Twitter" të Presidentit. "Unë mendoj se kemi pasur zgjedhje çdo nëntor që nga rreth 1788 dhe pres që do të ndodhë përsëri këtë vit", tha ai. Më herët të enjten, Trump ka postuar në "Twitter": "Me Votimin e Postës InUniversale ( jo votim në mungesë, i cili është i mirë), viti 2020 do të ketë zgjedhjet më të pasakta dhe mashtruese në histori. Do të jetë një siklet i madh për SHBA. Vonojmë zgjedhjet derisa njerëzit mund të votojnë siç duhet, të sigurt???". Ekspertët thonë se sistemi me postë dhe sistemi i votimit në mungesë janë në thelb e njëjta gjë.