Legalizimet, lista e re me familjet që marrin tapinë

Zbardhet vendimi i qeverisë me emrat e familjeve që marrin tapinë e legalizimit. Gazeta boton edhe listën e 1206 pronarëve, që kanë gati paratë e kompensimit

Agjencia e Kadastrës ka bërë publike emrat e qytetarëve, për të cilët kanë përfunduar procedurat e legalizimit dhe pronarëve që do të marrin paratë e kompensimit për tokën që iu është zënë nga ndërtimet pa leje.

Sipas tabelave zyrtare, janë 230 familje që do të marrin tapinë dhe 1206 të tjera, të cilat do të kompensohen nga Agjencia e Trajtimit të Pronave. Përfituesit janë në Tiranë dhe rrethe.

LEGALIZIMET Përmbyllja e praktikave të legalizimit u jep mundësi qytetarëve që, krahas lejes, të marrin edhe dokumentin e pronësisë. Por, paraprakisht duhet që të kryejnë pagesën e taksës së ndikimit në infrastrukturë, e cila është kusht për nisjen e procesit të regjistrimit. "Të gjithë personat që gjejnë emrin në listë t'u drejtohen zyrave tona për të tërhequr mandatin e pagesës së parcelës ndërtimore, nën masat e sigurisë anti- COVID- 19. Pas pagesës ju pajiseni me certifikatë përfundimtare pronësie", thuhet në njoftimin e Agjencisë së Kadastrës. Ndryshimet në ligjin "Për taksat vendore" që do të zyrtarizohen në muajin shtator të këtij viti do të çlirojnë qytetarët nga kjo faturë. Përfshirja e kësaj takse në 2018 s'ka bërë gjë tjetër, veçse ka ngadalësuar procesin e legalizimit. Taksa e ndikimit në infrastrukturë është 0.5 për qind e vlerës së investimit. Konkretisht, për një banesë me vlerë 5 milionë lekë, tarifa është 25 mijë lekë.

PRONARËT Familjet që pajisen me leje kanë ndërtuar në tokë të të tretëve, pra, në tokë me pronarë. Këtyre të fundit iu lind e drejta që të marrin paratë e kompensimit për pronën e zënë nga ndërtimet pa leje. Ndarja e fondit për këtë kategori bëhet nga Agjencia e Trajtimit të Pronave, e cila, përmes një njoftimi, bën me dije edhe hapjen e aplikimeve dhe dokumentet që duhet të dorëzohen nga pronarët për të përfituar pagesën.