Meta dekreton “5 qershorin”: I vetmi produkt që mundëson ëndrrën e anëtarësimit në BE
“Presidenti do të jetë në mbrojtje të Kushtetutës përballë çdo akti të ndryshimeve të njëanshme, të dhunshme e me urgjencë të pajustifikuar”
Ashtu siç kishte paralajmëruar, Presidenti Meta i dekretoi ndryshimet në Kodin Zgjedhor që u formuluan sipas marrëveshjes së arritur në Këshillin Politik mes maxhorancës dhe opozitës parlamentare.
Me anë të një njoftimi të shpërndarë për mediat, Presidenca bëri me dije se janë dekretuar ndryshimet në Kodin Zgjedhor si shenjë e avancimit të Shqipërisë në rrugën e saj drejt integrimin në Bashkimin Europian. “Kuvendi i Shqipërisë përmes shkresës Nr. 1961 Prot., datë 30.07.2020, ka përcjellë pranë Institucionit të Presidentit të Republikës për dekretim dhe shpallje, ndër të tjera, edhe Ligjin nr. 101/ 2020 “Për disa shtesa dhe ndryshime në ligjin nr. 10019, datë 29.12.2008 ‘ Kodi Zgjedhor i Republikës së Shqipërisë’, i ndryshuar’. Presidenti i Republikës, SH. T. Z. Ilir Meta, ashtu siç kishte garantuar, ditën e sotme pa asnjë vonesë ka dekretuar me shpallje Ligjin nr. 101/ 2020 ‘ Për disa shtesa dhe ndryshime në ligjin nr. 10019, datë 29.12.2008 ‘ Kodi Zgjedhor i Republikës së Shqipërisë’, i ndryshuar’. Ndryshimet në Kodin Zgjedhor janë i vetmi produkt i marrëveshjes konsensuale të 14 janarit dhe të 5 qershorit të dakordësuara në Këshillin Politik, që mundëson vijimin e sigurt të rrugëtimit europian të Shqipërisë dhe që kishin konsensusin dhe gjithëpërfshirjen e të gjithë aktorëve politikë në vend. Presidenti Meta rithekson edhe një herë se dialogu politik gjithëpërfshirës, transparent dhe i sinqertë ndërmjet forcave politike për të gjitha çështjet që prekin zgjedhjet është e vetmja rrugë që e afron Shqipërinë me Bashkimin Europian dhe e bën Reformën Zgjedhore në përputhje me standardet e OSBE/ ODIHR- it, siç ka kërkuar Këshilli Europian në 15 kushtet e vendosura për hapjen e negociatave. Për muaj me radhë Presidenti i Republikës ka përsëritur thirrjen që çdo ndryshim në lidhje me ligje të rëndësishme, duhet të bëhen vetëm përmes konsensusit unanim të Këshillit Politik. Presidenti Meta, gjen rastin të falënderojë të gjitha ato forca politike që me angazhimin e tyre të sinqertë dhe vullnetin e treguar në Këshillin Politik mundësuan arritjen e këtij rezultati në 5 qershor, që u kodifikua nga Parlamenti i Shqipërisë në datën 23 korrik përmes ndryshimeve në Kodin Zgjedhor, të cilat dekretohen sot”, thuhej në deklaratën e Presidencës. PARALAJMËRIMI Por më tej vihej theksi në një tjetër pikë, siç janë ndryshimet kushtetuese që u miratuan të enjten në Kuvend. Në këtë rast thuhet se Presidenti do të vijojë të qëndrojë përballë atyre që konsiderohen si ndryshime të njëanshme dhe të pajustifikuara të Kushtetutës. “Presidenti Meta do të jetë si gjithmonë në krye të detyrës në mbrojtje të Kushtetutës, të të drejtave të patjetërsueshme, lirive dhe vullnetit të qytetarëve për të marrë në dorë fatet e tyre përballë çdo akti të ndryshimeve të njëanshme, të dhunshme dhe me urgjencë të pajustifikueshme, si ai i Kushtetutës, që asgjësojnë shtetin e së drejtës, demokracinë dhe të ardhmen europiane të Shqipërisë”, shkruhej në deklaratë.
DEKLARATA Por Presidenti Meta nuk i shmangu mesazhet indirekte politike edhe gjatë vizitës së tij në teqenë bektashiane, ku përcolli urimin e tij për besimtarët myslimanë për festën e Kurban Bajramit. Meta u shpreh se duke marrë shembullin e liderëve fetarë, politika duhet të punojë për të evituar pengesat për rrugën e Shqipërisë drejt Bashkimit Europian. “Urimet më të mira për të gjithë besimtarët dhe qytetarët tanë, sepse kjo është një ditë shumë e rëndësishme vëllazërimi që na fton të bëjmë sakrifica për ta forcuar këtë solidaritet. Uroj që edhe politika të mësojë, të marrë këtë shembull të frymës së mirëkuptimit, të bashkëpunimit, të interesave më të mëdha qytetare. Jam i sigurt se populli do të udhëhiqet nga kjo harmoni që frymëzojnë këta udhëheqës të nderuar, të cilët bëjnë një punë të jashtëzakonshme për të edukuar qytetarët, në veçanti fëmijët dhe të rinjtë me vlerat më të mira hyjnore, njerëzore, qytetare dhe atdhetare. Njëkohësisht sot është një ditë e rëndësishme për t’u angazhuar të gjithë së bashku për atë qëllim madhor, që ka populli dhe vendi ynë: anëtarësimin në Bashkimin Europian dhe për të hequr sa më shpejt çdo pengesë që e frenon këtë ëndërr të jashtëzakonshme për t’u materializuar. Kjo është e vetmja rrugë që të rinjtë të mos na ikin, por edhe ata që kanë ikur të kthehen!”, tha Meta.