PD: Ekonomia në zgrip, situata jashtë kontrollit

Partia Demokratike denoncoi dje qeverinë se situata ekonomike e vendit i ka dalë jashtë kontrollit. Dorian Teliti shkruan se ekonomisë shqiptare nga keqqeverisja do t’i mungojnë të paktën 770 milionë euro. “Ekonomia në zgrip, qeverisë i ka dalë situata jashtë kontrollit. Të parët për taksat më të larta. Të parët për korrupsionin endemik ë strukturave shtetërore. Të parët dhe të vetmit që braktisem ekonominë. Vetë qeveria parashikon që të ardhurat mesatare për frymë në vitin 2020 priten të bien me 5.7%, ose me rreth 270 euro më pak për çdo shqiptar. COVID19 nxori tërësisht zbuluar paaftësinë e qeverisë për të menaxhuar situatën ekonomike, braktisjen që iu bëri qytetarëve dhe bizneseve, të gjithë e shohim qartësisht humnerën ku na ka zhytur. Sipas të dhënave zyrtare, humbja totale e të ardhurave vlerësohet të arrijë të paktën 770 milionë euro. Asnjëherë më parë, as në vitet e krizës botërore ekonomike 2008,

Shqipëria nuk ka shënuar një rekord të tillë në rënie, e kjo lidhet kryesisht me mungesën e vizionit dhe menaxhimin e keq të taksave dhe parave të shqiptarëve nga qeveria”, shkruan Teliti. Ai shprehet se misioni i Partisë Demokratike është të ndryshojë këtë situatë që ka lidhje me korrupsionin dhe keqmenaxhimin. “Partia Demokratike e ka këtë mision të qeverisjes së saj dhe në platformën tonë shqiptarët do të trajtohen si qytetarë të denjë të këtij vendi dhe me mundësi të barabarta. Qeveria e oborrtarëve do të japë llogari bashkë me miqtë oligarkë dhe paratë e shqiptarëve do t’u kthehen mbrapsht atyre. Çdo PPP korruptiv dhe çdo para e çuar padrejtësisht në xhepat e oligarkëve do të kthehet në investim për një jetë më të mirë për shqiptaret, që të rrinë në Shqipëri dhe jo me sytë nga bota”, shkruan Teliti.