Avokati i Ndroqit: Do ta ankimojmë, ka parregullsi, SPAK u betua para 8 muajsh
Përfaqësuesi ligjor i Ylli Ndroqit: Policia tha se hetimi zgjati 18 muaj, por prokurorët e SPAK u betuan te Presidenti para 8 muajsh
Avokati i biznesmenit Ylli Ndroqi deklaroi dje se do të ankimojë vendimin e Gjykatës dhe SPAK- ut për vendosjen e sekuestros së 26 pasurive dhe shoqërive në pronësi të sipërmarrësit.
Avokati Alban Qafa ka deklaruar sot se vendimi i Gjykatës kundër Krimit të Organizuar është shoqëruar me një sërë parregullsish ligjore, të cilat do të jenë në objektin e ankimimit. Pala mbrojtëse e sipërmarrësit ka ngritur hije dyshimi për mënyrën sesi u zhvilluan hetimet në adresë të biznesmenit. Avokati i Ylli Ndroqit tha sot se Policia deklaroi se hetimi ndaj biznesmenit po zhvillohej që prej 18 muajsh, ndërkohë që ai u shpreh se Struktura e Posaçme Antikorrupsion ( SPAK) është krijuar vetëm 8 muajt e fundit. “Ju bëjmë me dije se do bëjmë ankimim ndaj vendimit në SPAK. Vendimi ka një sërë parregullsish ligjore dhe procedurale, nga nxitimi për të mbyllur këtë akuzë. Është vendosur sekuestro mbi 26 pasuri. Po si është e mundur që për 7 ditë nga procedimi penal, u gjetën indicie për sekuestrimin e pasurive? Policia deklaroi se hetimi ka zgjatur 18 muaj, ndërkohë që para 8 muajsh prokurorët e SPAK- ut janë betuar para Presidentit të Republikës. Si mund të zhvillojë SPAK- u një hetim, kur nuk ka ekzistuar? Këto hetime të kryera nga Policia pa dijeni prokurori, janë hetime të paligjshme dhe ngrenë dyshime për mundësinë e keqpërdorimit të Policisë së Shtetit nga ana e qeverisë. Një pjesë e pasurive të vëna nën sekuestro nuk janë të gjitha nën pronësi të z. Ylli Ndroqi. Që në vitin 1993 është regjistruar te Tatimet si person fizik, më pas në 1996 është regjistruar te Tatimet si person juridik. Ka kryer një aktivitet tregtar, që ka nisur që në vitin 1991. Jeni dëshmitarë të qëllimit të nxitimit të këtij hetimi nga SPAK- u, nxitime me prapavijë politike që u kanë kushtuar jo pak qytetarëve shqiptarë. Prezenca e forcave të
RENEA- s kur u ekzekutua vendimi i Gjykatës bëhet me qëllimin për të ndalur zërin e mediave që ka në pronësi z. Ylli Ndroqi. Të gjitha aktivitetet janë me kredi dhe këto godina, godinat e ‘ Ora News’, janë të financuara 100% rikonstruksioni i tyre nga bankat me kredi. Po ashtu, janë me vendim gjykate tri automjete të sekuestruara, por të tria nuk ekzistojnë, nuk e di ku i ka gjetur SPAK, edhe një apartament në Durrës nuk ekziston, nuk e di ku e kanë gjetur”, tha avokati i Ylli Ndroqit.
SEKUESTRIMI SPAK ka sekuestruar më 3 gusht 26 pasuri të paluajtshme të Ylli Ndroqit, pronar i një televizioni privat në Tiranë. Në lidhje me këtë lajm u prononcuan para Policisë së Tiranës avokatët e Ndroqit. Ata thanë se vendimi për sekuestrimin e pasurisë së Ndroqit është vendosur nga Gjykata e Shkallës së Parë të SPAK- ut, ndërsa do të apelojnë këtë vendim në shkallë më lart të Gjyqësorit. Për avokatët, sulmi ndaj Ylli Ndroqit është politik, pasi biznesmeni ishte në gjyq me kryebashkiakun e Tiranës, Erion Veliaj. “Ylli Ndroqi nuk është i shoqëruar. Na është dhënë vendimi në dorë për sekuestro. Ky është vendim i shkallës së parë të SPAK- ut, do ta apelojmë. Makina e tij ndodhet në ambientet e Policisë së Tiranës. Zoti Ylli Ndroqi do të provojë para Gjykatës se pasuria e tij është e ligjshme dhe e vendosur nga bizneset e tij. Ky është një sulm politik ndaj Ylli
Ndroqit, pasi ishte në gjyq me kryebashkiakun e Tiranës, Erion Veliaj”, deklaruan avokatët.
AVOKATI Avokati i Ylli Ndroqit, Alban Qafa, ka folur për mediat ku ka bërë të ditur se Ndroqi nuk është ndaluar dhe as shoqëruar, por ka bërë shoqërimin e mjetit të tij “Mercedes- Benz”, modeli S 600, pasi është ndaluar nga forcat operacionale për sekuestrimin e makinës si pjesë e vendimit të SPAK- ut. Avokati i tij tha se vendimi për sekuestrimin e pasurive të tij do të apelohet në Apelin e GJKKO- së, pasi pasuritë e tij janë të ligjshme. Avokati shprehet se Ylli Ndroqi mendon se ky është një sulm politik që po i bëhet atij, pas gjyqit që ka të hapur me kreun e Bashkisë Tiranë, Erion Veliaj. “Është vendosur sekuestro e pasurive të tij. Ka qenë duke udhëtuar me makinën e tij ‘ Mercedes- Benz’, modeli S 600 dhe është ndaluar nga forcat operacionale për t’i marrë makinën si pjesë e sekuestros. Ylli Ndroqi nuk është ndaluar dhe as shoqëruar, por ka shoqëruar makinën e tij dhe të kërkojë sqarime. Brenda afatit ligjor 5- ditor do ta apelojmë. E gjithë pasuria e tij është e krijuar nga burime të ligjshme, është e krijuar nga aktivitete të shoqërisë së tij dhe nga kreditë bankare. Ai mendon se ky është një sulm politik për shkak të gjyqit që po zhvillohet njëkohësisht ndaj tij dhe kryebashkiakut Erion Veliaj”, tha avokati Alban Qafa ditën kur u ekzekutua vendimi i Gjykatës.