Meta apelon për votën e emigrantëve
“Me rëndësi përfshirja e diasporës në proceset demokratizuese”
Presidenti Meta priti dje dy përfaqësues të diasporës shqiptare, që janë organizuar në një lëvizje të quajtur “Diaspora për Shqipërinë e Lirë”.
Postimin në rrjetet sociale, ku publikoi foton me dy aktivistët e diasporës, Florian Haçkaj dhe Bledar Milaqi, Presidenti Meta e shfrytëzoi edhe për të bërë një thirrje për rritjen e përfaqësimit në nivel vendimmarrje të emigrantëve. Sipas kreut të shtetit, përfshirja më shumë e diasporës në proceset vendimmarrëse dhe demokratizuese është me rëndësi të madhe për të ardhmen europiane të Shqipërisë. “Kënaqësi të prisja sot bashkëthemeluesit e Lëvizjes ‘ Diaspora për Shqipërinë e Lirë’, Florian Haçkaj dhe Bledar Milaqi. Përfshirja më aktive e diasporës në proceset demokratizuese dhe vendimmarrëse për të ardhmen europiane të vendit është shumë e rëndësishme”, shkroi Meta në postimin e tij në rrjetet sociale.
Nga ana tjetër, përfaqësuesit e kësaj organizate të shqiptarëve të diasporës bënë të ditur se takimi u zhvillua me qëllimin për ta informuar Presidencën mbi misionin dhe aktivitetin që kjo lëvizje synon të realizojë. “Gjatë takimit, ndër të tjera, vëmendje e veçantë iu kushtua realizimit të së drejtës kushtetuese, votës së shqiptarëve jashtë kufijve të Shqipërisë dhe gjithashtu përfaqësimit të drejtpërdrejtë të diasporës në Parlamentin shqiptar. Po ashtu, u shtjellua edhe qasja institucionale e lëvizjes si dhe aksesi i saj në institucionet ndërkombëtare. Njëkohësisht u shpalos qartë vullneti për të ndjekur në terma afatgjata dhe në mënyrë proaktive proceset politikëbërëse dhe vendimmarrëse brenda Shqipërisë”, thuhet në njoftimin e shpërndarë për mediat nga “Diaspora për Shqipërinë e Lirë”. Vlen të theksojmë se anëtarë të kësaj organizate i dërguan një kërkesë Presidentit, Kuvendit, kryetarëve të forcave politike, ministrit të Shtetit për Diasporën dhe përfaqësive diplomatike etj, për mundësimin e votimit në zgjedhjet e përgjithshme dhe lokale nëpërmjet postës, të shtetasve shqiptarë, që jetojnë jashtë Shqipërisë, si një detyrim ligjor i shtetit shqiptar, i papërmbushur kundrejt shtetasve të tij.