Opozita e bashkuar, kundër ndarjes së Shqipërisë në 4 rajone
Çupi: “Uzurpon kompetencat e bashkive”. Nënkryetari i LSI: “Ligji i miratuar më 30 korrik, antikushtetues”
Opozita e bashkuar denoncoi dje një ligj të miratuar pa shumë zhurmë në të njëjtën ditë me ndryshimet kushtetuese për ndarjen e Shqipërisë në 4 rajone, që do të drejtohen nga një agjenci kombëtare, me në krye zv. kryeministrin.
Përmes një deklarate, ishdeputetja e Partisë Demokratike, Dhurata Çupi, ndryshimet e ligjit largojnë pushtetin lokal nga qytetarët. Sipas ish- deputetes së PD- së, qytetarët do ta kenë më të vështirë për të marrë shërbimet. “Miratimi i ligjit që ndan Shqipërinë në 4 rajone është kundër interesit të qytetarëve. Pas reformës së dështuar për ndarjen e Shqipërisë në 61 bashki, ky ligj largon akoma më shumë shërbimet nga njerëzit. Qytetarët e 57 bashkive të vendit duhet të shkojnë deri në 1 nga 4 bashkitë qendër rajoni, për të marrë një shërbim të caktuar. Kjo do ta bëjë edhe më të vështirë sesa tani komunikimin mes pushtetit lokal dhe qytetarëve. Në këtë mënyrë, qeveria centralizon pushtetin me të emëruarit e saj, duke dëmtuar rëndë interesin publik”, tha Çupi. Sipas PD- së, ndryshimi i ligjit është vendim për përfitime elektorale. “Heqja e shërbimeve ndaj qytetarëve në vendin ku ata banojnë nuk i intereson Edi Ramës. Interesi i tij për miratimin e ligjit absurd që ndan Shqipërinë në 4 rajone është vetëm politik, elektoral dhe financiar. Ligji i miratuar pa zhurmë ditën e miratimit të ndryshimeve të njëanshme kushtetuese dobëson pushtetin lokal dhe rrit fuqinë e qeverisë qendrore, duke marrë kompetenca të bashkive apo të qarqeve”, vijoi ish- deputetja. DENONCIMI I LSI Sakaq nënkryetari i LSIsë, Petrit Vasili, akuzoi qeverinë se me ligjin e miratuar ditën e ndryshimeve të njëanshme kushtetuese ka shkelur Kushtetutën. Ndërkohë, ndryshimet sipas tij i marrin kompetencat pushtetit lokal. “Çfarë do të thotë me fjalë të thjeshta? Do të thotë pushtim nga qeveria i pushtetit lokal. Sepse këto rajone i mbivendosen dhe i rrëmbejnë kompetencat qarqeve, të cilët janë të përcaktuar qartësisht në Kushtetutën e Shqipërisë e ku ndodhen atje edhe sot e kësaj dite. Pasi flitet shumë qartë që njësitë e qeverisjes vendore, në nenin 108 të Kushtetutës, janë komunat ose bashkitë dhe qarqet. Kufijtë e tyre, - thotë neni 108 pika 2, - nuk mund të ndryshohen pa u marrë më parë mendimi i popullsisë që banon në to. Dhe çfarë ka ndodhur? Me një ligj të thjeshtë që mund të miratohet edhe me 36 vota, i rrëmbehen kompetencat e zhbëhet një autoritet lokal i zgjedhur, siç është qarku”, tha Vasili. Ndërkohë, neni 110 pika 2 e Kushtetutës, sipas Vasilit e përcakton qartë se: “Qarku është njësia ku ndërtohen e zbatohen politikat rajonale dhe ku ato harmonizohen me politikat shtetërore”. Po ashtu, nënkryetari i LSI- së denoncoi se edhe ligjet referuese të maxhorancës për ndryshimin e ligjit nuk janë të sakta. “Shikoni që nxitimi i pushtuesve të pushtetit lokal është kaq i madh, që baza kushtetuese e cituar është një turp, por është njëkohësisht dhe një faj i rëndë ligjor dhe penal. Nenet ku bazohen këta, praktikisht janë nenet 78 dhe 83. Neni 78 thotë: ‘ Kuvendi me shumicën e votave, në prani të më shumë se gjysmës së të gjithë anëtarëve, vendos, përveç rasteve ku parashikon Kushtetuta ndryshe. Kjo tregon mënyrën sesi votohet një ligj. Nuk ka lidhje fare me përmbajtjen. Këtë e kupton edhe shqiptari më i thjeshtë, ai më i painteresuari. Po neni 83 ça thotë, meqë këta kanë cituar nenin 83 pika 1. ‘ Projektligji votohet 3 herë në parim, nen për nen dhe në tërësi’. Ka ndonjë shqiptar që nuk e di që çdo ligj votohet në parim nen për nen dhe në tërësi?”, vijoi Vasili