Vritet me sende të forta 57- vjeçari, autori në kërkim
Policia në kërkim të autorit, telefonoi familjarët pas krimit
Një ngjarje e rëndë tronditi pasditen e së mërkurës Gjirokastrën, pasi u gjet i pajetë një 57- vjeçar brenda mjetit të tij në aksin rrugor rural Polican- Suhë.
Sipas bluve të Gjirokastrës, në trupin e viktimës kishte shenja dhune dhe dyshimet janë që ai të jetë goditur me sende të forta. "Në aksin rrugor rural PolicanSuhë, shtetasi G. S., 57 vjeç, banues në Gjirokastër, në rrethana ende të paqarta është gjetur i pajetë në mjetin e tij tip kamionçinë. Nga këqyrja paraprake dyshohet se është goditur me sende të forta. Shërbimet e Drejtorisë Vendore të Policisë dhe të Komisariatit të Policisë Gjirokastër kanë ngritur pika kontrolli dhe po kontrollojnë zonën për shoqërimin e personave të dyshuar si autorë të ngjarjes apo që mund të kenë dijeni për ngjarjen. Grupi hetimor, nën drejtimin e Prokurorisë së Rrethit Gjyqësor Gjirokastër, po vijon punën për sqarimin e rrethanave të ngjarjes, me qëllim identifikimin dhe kapjen e autorëve", njoftoi Policia.
NGJARJA Viktima e ngjarjes, që ka lënë të habitur banorët e zonës malore, është Gëzim Saraçi, banues në fshatin Humelicë të Gjirokastrës. Babai i tre fëmijëve në moshë madhore, dy vajza e një djalë, ishte një emër i njohur për zonën. Ai punonte rregullisht në këtë segment rrugor për transport mallrash, drurësh apo inertesh dhe njihej si një person i qetë në zonë. "Panorama" mëson se autori i dyshuar i krimit po udhëtonte në të njëjtin mjet me viktimën Saraçi, në kamionçinën ku dhe u gjet i pajetë 57vjeçari. Gjatë rrugës, Saraçi dhe autori dyshohet se kanë pasur një konflikt për motive të dobëta. Autori i vrasjes e ka goditur me sende të forta në kokë Saraçin, duke bërë që ky i fundit të humbë jetën. Burimet për gazetën "Panorama" bënë të ditur se autori dyshohet të jetë nga fshati Dervician i Dropullit. Pas ngjarjes ai ka telefonuar familjarët e tij, duke u pohuar se "e kishin vrarë". Kanë qenë pikërisht familjarët e autorit, të cilët kanë shkuar në vendngjarje dhe kanë gjetur viktimën. Ndërsa nuk ka pasur asnjë gjurmë nga autori që mendohet të jetë po i plagosur. Forca të shumta policore, të ndihmuara edhe nga banorë të zonës, nisën kërkimin e autorit duke bërë një krehje të zonës, në një terren malor dhe të thepisur. Telefonata e kryer nga autori ngre dyshimet se edhe ai mund të jetë i plagosur.