COVID- 19, Dasho: Për një muaj, 18 mijë të infektuar

“Në 10 qershor- 10 korrik janë diagnostikuar vetëm 2 mijë”

Tabelat me rastet ditore apo shifra e të infektuarve aktivë në vendin tonë nuk pasqyrojnë situatën reale. Ekspertët janë të mendimit se numri i të infektuarve në vendin tonë është shumë herë më i madh nga çka raportohet nga autoritetet. Kështu, sipas mjekut epidemiolog, Erion Dasho, për periudhën 10 qershor deri në 10 korrik, vlerësohet që numri i të infektuarve të ketë qenë 18 mijë persona, por, në fakt, nga Ministria e Shëndetësisë janë diagnostikuar vetëm 2 mijë persona. “Duke gjykuar nga numri i vdekjeve nga COVID gjatë muajit korrik ( 93 raste), numri i personave të infektuar gjatë periudhës 10 qershor deri 10 korrik vlerësohet në afërsisht 18,000 persona. Gjatë së njëjtës periudhë janë diagnostikuar më pak se 2,000 persona ( saktësisht 1,979), pra, 9 herë më pak se numri i vlerësuar i të infektuarve. Duket qartë se testimi dhe gjurmimi arrijnë të kapin vetëm majën e ajsbergut COVID- 19 në Shqipëri”, ka shkruar doktori në rrjetet sociale. Kjo ka prodhuar një grafik që vështirë se mund të analizohet. Për të gjitha këto, burimi është dhe mbetet numri i ulët i testimeve, i cili varion mesatarisht 400 deri në 500 tamponë në ditë. “Shkarravina dhe grafiku me rritje konstante nuk janë të besueshëm. Në rastin më të mirë, variacionet e tipit ‘ made in Albania’ mund të shpjegohen me numrin e ulët të testimeve. Në rastin më të keq, grafikët mund të jenë rezultat i një sërë gabimesh teknikë apo njerëzorë, ku mund të veçohen paaftësia në gjurmim, aplikimi i testit jo sipas indikacioneve epidemiologjike etj. Sidoqoftë, në themel të problemit qëndron numri i pamjaftueshëm i testimeve”, vë në dukje eksperti i shëndetit publik, Erion Dasho. Sipas tij, ndërsa grafiku i rasteve ditore të diagnostikuar me COVID- 19 në Shqipëri anon më tepër nga shkarravina ( me gjithë tendencën e qartë në rritje), epidemiologët dhe shkencëtarët e të dhënave detyrohen të përdorin metoda analitike për të hedhur sadopak dritë mbi atë që po ndodh realisht me epideminë e COVID në Shqipëri. “Një prej këtyre metodave është përdorimi i mesatares javore në vend të rasteve ditore. Tashmë, grafiku merr një pamje më të qartë dhe kuptohen dy tendenca. Tendenca e parë: deri në fillim të qershorit, mesatarja javore ka pasur ulje- ngritje të çrregullta, por pa e kaluar mesataren ditore prej 23 rastesh. Këto luhatje duket sikur kanë ndjekur masat tekanjoze të marra gjatë ditëve të karantinës. Tendenca e dytë: nga mesi i qershorit e në vijim, rritja e numrit të rasteve është konstante dhe me tendencë rritje graduale”, thekson ai. Dasho apelon për rritje të testimeve si e vetmja mënyrë kjo për të kuptuar në ç’pikë jemi dhe më e rëndësishmja çfarë duhet të presim. “Nëse për të kontrolluar COVID nevojiten të dhëna të besueshme të survejancës epidemiologjike, evidencë shkencore dhe përvojë mjekësore e konsoliduar, përgjigjja e deritanishme shqiptare çalon dhe rrëzohet që në kërkesën e parë. Grafikët e ngjashëm me sharrën dhëmbëthyer dhe epidemiologjia e çantës së zezë duhet t’u lërë vendin sa më shpejt testimeve bazuar në nevojat, metodave inteligjente të hetimit epidemiologjik dhe gjurmimit dixhital”, mbyll statusin e tij doktori.