Pronat, dokumentet për të marrë kompensimin
Kadastra hap aplikimet për 1200 pronarët e shpronësuar për efekt të legalizimeve. Kërkohet dëshmi e trashëgimisë, prokurë, numër llogarie
Nisin procedurat për kompensimin financiar të pronarëve të pasurive të paluajtshme që preken nga ndërtimet pa leje.
Agjencia e Trajtimit të Pronave ka njoftuar një ditë më parë hapjen e aplikimeve për 1200 pronarë të shpronësuar për efekt të procesit legalizues. "Në zbatim të VKM Nr. 383, datë 19.05.2010 ' Për përcaktimin e procedurave të shpërndarjes së fondit të kompensimit në vlerë për pronarët e pasurive të paluajtshme, pronë private, që preken nga ndërtimet informale', i ndryshuar, Agjencia e Trajtimit të Pronave njofton: Fillimin e procesit të pranimit të kërkesave për kompensimin e pronarëve të pasurive të paluajtshme, që preken nga ndërtimet informale, gjeneralitetet dhe të dhënat e të cilëve janë sipas VKM Nr. 604, datë 29.07.2020. Procesi i pranimit të kërkesave të subjekteve përfituesve do të fillojë në datën 12.08.2020 dhe nuk do të jetë i kushtëzuar dhe i kufizuar në kohë", ka bërë me dije ATP.
FONDI Gazeta boton sot emrat e përfituesve në Tiranë dhe rreth, e të cilët në fazën e parë do të kenë mundësi të marrin 5 këste shpërblim në masën 70 për qind të vlerës që ka prona sot në treg. Fondi që do të ndahet për këto familje, sipas vendimit të qeverisë, kap vlerën e rreth 5 milionë dollarëve. Sakaq, për rastet me mbivendosje apo që kanë konflikti ndarja e parave në masën respektive do të bëhet pas përfundimit të procesit gjyqësor.
DOKUMENTET Lidhur me dokumentet që duhet të dorëzohen, krahas kërkesës për kompensimin e pronës, sipas formatit tip, që i vihet në dispozicion nga ATP, pronarët që kanë emrin në listë duhet të dorëzojnë: Dëshminë e trashëgimisë për të gjithë trashëgimtarët e ligjshëm të subjektit përfitues, prokurën e posaçme, të nënshkruar nga të gjithë subjektet që përfitojnë kompensim, numër llogarie. Po ashtu, kërkohet fotokopje e dokumentit të identifikimit si edhe mandatpagesën që vërteton pagimin e tarifës së shërbimit në vlerën 2 000 lekë. "Subjektet përfituese, kërkesa e të cilëve nuk është pranuar për mungesë dokumentacioni gjatë procedurave të mëparshme, kanë të drejtë të riaplikojnë. Këto subjekte nuk paguajnë tarifë shërbimi, nëse provojnë pagimin e saj gjatë aplikimit të mëparshëm", ka sqaruar Agjencia.