Moti i keq rrezikoi jetën e tre të rinjve, shpëtuan pas pesë orësh

Për disa orë, rrebeshi i shiut i shoqëruar me erëra të forta ka shoqëruar mëngjesin e djeshëm gjithë bregdetin e jugut në vend. Pas tragjedisë së ndodhur në Himarë, një tjetër ngjarje u raportua nga Policia e Vlorës. Sipas informacioneve të Policisë, tre të rinj nga qyteti i Vlorës kanë rrezikuar mbytjen në det. Ata janë nisur me gomone nga bregdeti i Vlorës, teksa në mesin e detit i ka kapur stuhia me erë të fortë. Ata kanë qëndruar për 5 orë në det, pasi nuk kanë mundur të ankorohen për shkak të shiut dhe erës së fortë. Pas 5 orësh, me ndihmën edhe të Rojës Bregdetare, të rinjtë kanë dalë shëndoshë e mirë në bregdet në plazhin e Lukovës. Të tre ndodheshin në gjendje të mirë shëndetësore. Burimet thanë se të rinjtë kanë kundërshtuar edhe urdhrat e dhënë nga Kapitaneria për shkak të motit të keq, ku asnjë mjet i vogël lundrues nuk është lejuar të dilte në det.

Reshjet e dendura të shirave, por dhe era e fortë boshatisi dje bregdetin e Himarës e jo vetëm. Dita e djeshme shënoi ulje të ndjeshme të temperaturave, erë të fortë dhe reshje të shirave. Si pasojë e situatës, pushuesit u larguan nga bregdeti. Ndërkohë, shirat e dendur të shoqëruar me erë të fortë shkaktuan incident edhe në aksin GjirokastërKakavijë, ku si pasojë është rrëzuar një pemë duke bllokuar kështu për pak kohë qarkullimin në këtë aks. Megjithatë, shirat kanë dhënë ndihmesë në shuarjen e flakëve që prej disa ditësh kanë pushtuar pyjet. Edhe niveli në liqenin e Fierzës ka nisur të rritet. Meteorologët nga ana e tyre bënë të ditur se shirat do të vazhdojnë deri ditën e diel.