Ulet numri i popullsisë, Tirana dhe Durrësi, qytetet e vetme që nuk njohin rënie

Durrësi kalon Fierin si qyteti i dytë më i madh pas Tiranës. Ikje masive nga Gjirokastra, Kukësi, Dibra, Berati dhe Korça

Durrësi është renditur në vitin 2020 në qarkun e dytë më të madh në vend pas Tiranës, duke ia kaluar në këtë mënyrë Fierit, që deri tani ishte pas kryeqytetit për numrin e popullsisë.

Sipas të dhënave të INSTAT- it, që u përpunuan nga revista “Monitor”, në vitin 2020 Durrësi ka 290.7 mijë banorë, me rritje të lehtë prej 0.2%, duke ia kaluar për herë të parë Fierit. Ky i fundit zbriti në 289.9 mijë banorë, pasi popullsia e tij ra me rreth 1.7%. Në fakt, Fieri së bashku me Elbasanin rezultojnë qarqet me reduktimet më të mëdha të popullsisë që nga viti 2001, kur INSTAT raporton të dhënat. Të dyja këto qarqe kanë humbur rreth 92 mijë banorë në dy dekadat e fundit. Me zvogëlim në dy dekadat e fundit rezultojnë dhe të gjitha qarqet e tjera: Kukësi, Lezha, Gjirokastra, Shkodra, Korça, Berati. Në raport me popullsinë përkatëse, qarku që është reduktuar më shumë është Gjirokastra, që pothuajse është përgjysmuar. Në Gjirokastër, në 2020 jetojnë 59 mijë banorë, nga rreth 113 mijë në vitin 2001. Kjo ka bërë që ky qark të jetë sot më i vogli në vend, ndërsa në vitin 2001 ishte Kukësi me më pak banorë. Dibra është një tjetër qark që ka humbur gati 40% të popullsisë në dy dekada, duke zbritur në 116 mijë banorë. Berati është reduktuar me - 37% në krahasim me vitin 2001, Kukësi me - 32%, Shkodra me - 22%, Korça me - 23%, Elbasani me - 25%, Fieri me - 24%. Pothuajse e pandryshuar, me një rënie të lehtë prej 2% ka mbetur popullsia e Vlorës. Rritja e fortë e Tiranës dhe më pak e Durrësit. Tirana dhe më pak Durrësi rezultojnë të vetmet qarqe që kanë njohur rritje të popullsisë në dy dekadat e fundit, pasi kanë përfituar nga migrimi i brendshëm i popullsisë. Teksa të gjithë duan të jetojnë e punojnë në kryeqytet, popullsia e saj është rritur me 52% në dy dekadat e fundit, duke arritur në 906 mijë banorë, nga 597 mijë në vitin 2001. Edhe Durrësi është zgjeruar me 19%, duke u bërë në këtë mënyrë qyteti i dytë më i madh në vend, nga i katërti që ishte në vitin 2001, pas Tiranës, Fierit e Elbasanit. Rritja e Tiranës dhe Durrësit nuk ka arritur të kompensojë tkurrjen e qarqeve të tjera dhe si rrjedhojë, popullsia e Shqipërisë është reduktuar me 217 mijë persona në dy dekadat e fundit, ose me madhësinë e një qyteti sa Korça. Në 2020, Shqipëria vlerësohet se ka rreth 2.84 milionë banorë. Emigracioni dhe rënia e lindshmërisë janë faktorët që kanë ndikuar në tkurrjen e ndjeshme të popullsisë së Shqipërisë në 3 dekadat e fundit.