Pampuri: Shëndetësia në kaos, përballimi i pandemisë i vështirë

Pas raportit të Organizatës së Kombeve të Bashkuara, në të cilin ngrihej shqetësimi se situata e krijuar nga pandemia rriskon të lërë pas dore pacientët kronikë dhe me sëmundje të tjera të trajtueshme, ka reaguar edhe ish- deputetja e PD- së, Oriola Pampuri. Përmes një postimi në rrjetet sociale, Pampuri akuzon qeverinë se në 7 vitet e fundit e ka zhytur shëndetësinë në kaos. “Me një shërbim urgjence në kaos, çka u vërtetua dhe nga qytetarët vetë këto muaj dhe me një numër të vogël të mjekëve të parësorit, përballimi i pandemisë si dhe i trajtimit dhe i ndjekjeve të sëmundjeve kronike bëhet akoma më i vështirë. Shpenzimet për shëndetësinë në Shqipëri listohen ndër më të ulëtat ndër vendet e Europës Juglindore, rreth 2.97%. Me një buxhet të cunguar, me një keqmenaxhim dhe abuzim të fondeve me koncesionet e dështuara në shërbime, por në dobi vetëm të xhepave të oligarkëve, sistemi ka hyrë në kolaps”, ka shkruar ish- deputetja e djathtë. Sipas saj, edhe përballë kësaj situate të krijuar nga pandemia, qeveria sërish ka lënë të paprekshme koncesionet. “Ndërkohë, Shqipëria ka luksin dhe vijon ta ketë që koncesionet të mos i anulojë, edhe pse përballë një situate të vështirë të shkaktuar nga pandemia, madje në vijim të marrëzive, vijon me to siç është edhe rasti i laboratorit në QSUT, ku 73 mjekë e personel tjetër shëndetësor dalin të papunë për shkak se koncesionari do të vijojë punën pa i hyrë asnjë gjemb në këmbë. Shëndetësia tashmë është në kaos, prej 7 vitesh u dëmtua rëndë nga diletantët dhe abuzuesit e pashpirt, të cilët, përveç shpërdorimit dhe abuzimit me fondet që pasuruan oligarkët e Edi Ramës, nuk menduan për asgjë tjetër”, mbyll statusin Pampuri.