Sekuestrohet rreth 1 kg heroinë, u gjet e fshehur në një shtëpi

TIRANE – Policia e Tiranës njoftoi dje për finalizimin e një operacioni të kryer nga shërbimet e Antidrogës në bashkëpunim me Komisariatin Nr. 3, të koduar “Porosia”, gjatë të cilit u sekuestrua 1 kg e 75 gramë lëndë narkotike e llojit heroinë. Në pranga përfundoi një 31- vjeçar që posedonte dhe shpërndante lëndën narkotike. “Seksioni për Hetimin e Narkotikëve, në bashkëpunim me Komisariatin e Policisë Nr. 3 Tiranë, në bazë të informacioneve të siguruara në rrugë operative nga burime të ndryshme, finalizoi me sukses operacionin policor të koduar ‘ Porosia’, në kuadër të të cilit u bë kapja dhe arrestimi në flagrancë i shtetasit E. Z., 31 vjeç, banues në Tiranë”, tha zyrtarisht Policia. Më tej sqaroi se nga ana e Seksionit për Hetimin e Narkotikëve, në bashkëpunim me Komisariatin Nr. 3 Tiranë, janë siguruar informacione në rrugë operative se në një banesë në rrugën “Asdreni”, kishte një sasi të konsiderueshme lënde narkotike të llojit heroinë dhe peronat që e dispononin ua shisnin shpërndarësve sipas porosive që bënin. Mbi bazën e këtyre informacioneve, nga ana e punonjësve të Policisë të Komisariatit të Policisë Nr. 3 Tiranë, në bashkëpunim me Seksionin për Hetimin e Narkotikëve, në rrugën “Asdreni” është ushtruar kontroll në banesën e shtetasit E. Z., ku Policia gjeti dhe sekuestroi në cilësinë e provës materiale 1 kg e 75 gr. lëndë narkotike të dyshuar heroinë, një pjesë e së cilës ishte ndarë në doza gati për shitje, 1 aparat celular dhe një automjet. “Vazhdon puna intensive për zbardhjen e plotë të veprimtarisë kriminale, identifikimin dhe kapjen e personave të tjerë të përfshirë në këtë aktivitet kriminal”, tha Policia.