Grabitje e trafik droge, OFL letër 5 personave
Policia: Duhet të përgjigjen me shkrim brenda 48 orëve
TIRANE - Pesë persona, një i dënuar për trafik droge e pjesëmarrje në organizatë kriminale dhe 4 të tjerë, për vjedhje me armë e vjedhje me dhunë, kanë marrë letër dje nga OFL, që u kërkon deklarimin e burimit të pasurisë brenda 48 orëve. Policia e Shtetit njoftoi zyrtarisht se vijon pa ndërprerë Operacioni Forca e Ligjit, në zbatim të detyrave të përcaktuara në Aktin Normativ të datës 31 janar 2020. Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë shtetasve: Erneo Farruku, me banim në Durrës, i dënuar në Spanjë për veprën penale "Trafik droge" kryer në bashkëpunim dhe "Pjesëmarrja në organizatë kriminale"; Ahmet Alla, me banim në Tiranë, i dënuar për veprën penale "Vjedhja me armë"; Edison Alhasa, me banim në Tiranë, i dënuar për veprën "Vjedhja me dhunë"; Dritan Gjata, me banim në Tiranë, i dënuar për veprën penale "Vjedhja me armë"; Ardian Sula, me banim në Tiranë, i dënuar për veprën penale "Vjedhja me armë". "Këta individë, si subjekt i Ligjit Special, duhet t'u përgjigjen me shkrim, brenda 48 orësh, të gjitha pyetjeve të OFL- së dhe më pas, përgjigjet e marra do t'i dërgohen SPAK- ut për veprime të mëtejshme. OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special. OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë", tha zyrtarisht Policia.