Kukësi me fat, Teuta pret Beitar Jerusalemin
Dje janë mësuar edhe ekipet kundërshtare për tri skuadrat shqiptare që do të marrin pjesë në turin e parë kualifikues të Europa Ligës, për Kukësin, Teutën dhe Laçin.
KUKËSI - SLAVIA E SOFIES Kukësi mund të cilësohet me shumë fat nga shorti i hedhur dje në Nion të Zvicrës. Goglat i rezervuan skuadrës së Skënder Gegës një përballje me bullgarët e Slavies së Sofies dhe për më tepër në shtëpi. Kësisoj, më 27 gusht, verilindorët do të presin në stadiumin "Air Albania" kundërshtarin për turin e parë të Ligës së Europës. Përveç bullgarëve të Slavias, kundërshtarë të mundshëm ishin edhe hungarezët e Pushkash Akademi dhe polakët e Krakovias. Në letër ekipi bullgar ishte ndoshta më i preferuari dhe kështu ndodhi.
TEUTA - BEITAR JERUSALEM Beitar Jerusalemi është kundërshtari i Teutës në turin e parë eliminator të Ligës së Europës. Nuk kanë qenë më shumë fat durrsakët, të cilët shpresonin që goglat të nxirrnin ndonjë skuadër nga Mali i Zi, apo nga Andorra si kundërshtar të tyre. "Djemtë e detit" do ta presin në "Niko Dovana" skuadrën izraelite dhe ky mund të jetë një avantazh për ta, pasi lodhjen nga udhëtimi do ta vuajë kundërshtari. Ndeshja është programuar të zhvillohet më 27 gusht në stadiumin "Niko Dovana", ku durrsakët do të kërkojnë me çdo kusht kalimin në turin tjetër, ndonëse e kanë të qartë se nuk do ta kenë aspak të lehtë.
KESHLA- LAÇI Laçi do të përballet në raundin e parë të Ligës së Europës me azerët e Keshlas. Shorti i ka vendosur përballë ekipin nga Azerbajxhani. Keshla është drejtuar në të kaluarën nga ish- trajneri i Kukësit dhe Luftëtarit, Mladen Milinkoviç, në vitin 2018. Bëhet fjalë për ekipin që më herët quhej Inter Baku, por e ndryshoi pas ristrukturimit që i bëri klubit. Sfida e parë do të luhet në Azerbajxhan, çka i shton akoma më tepër vështirësitë për kualifikimin e kurbinasve.